Ata o venres 7 de novembro poderase visitar na biblioteca do Colexio Martínez Otero unha exposición sobre a evolución do libro de texto empregado no ensino organizada pola Comisión de Biblioteca do centro.
Con esta exposición o alumnado terá a posibilidade de observar como foron mudando as materias, os contidos ou os modos e maneiras de impartir a docencia. O percurso comeza co exemplar máis antigo datado en 1831 para rematar nos nosos días. Así, con esta ampla panorámica, plasmada nos libros de texto, pretendemos deixar constancia da evolución do ensino e de como este non pode, nin debe, ser alleo aos cambios históricos e sociais que se producen na nosa sociedade.
A exposición contará cunha explicación teórica para o alumnado de primaria e secundaria e, ademais, poderá ser visita sempre que o desexen no horario de biblioteca establecido. As familias que queiran contemplala tamén o poderán facer achegándose á mesma en horario de luns a venres de 17.30 horas a 18 horas.