O Concello de Burela realiza melloras na grada principal do campo de fútbol de herba artificial da Marosa

Burela, 1 de outubro de 2014. O Concello realiza melloras na grada principal do campo de fútbol de herba natural da Marosa, segundo deu a coñecer esta mañá o concelleiro de Obras, Manuel Fernández Valle. O importe dos traballos achégase aos 9.000 euros.

O edil popular explicou que “a cuberta desa grada, é unha estrutura de formigón e ferro, que non dispoñía de ningún tipo de illante, algo que podería ocasionarlle danos no futuro por mor das filtracións de auga durante os invernos. O que imos facer é cubrir cunha placa metálica de ferro galvanizado de cor verde acorde con ese entorno toda esa cuberta. Estamos a falar dunha superficie duns 500 metros cadrados. E tamén, cando todo estea perfectamente seco, imos proceder ao lucido e acondicionamento da parte interior desa estrutura”.

Manuel Fernández Valle calcula que no prazo dunhas dúas semanas, “se o tempo segue a ser bo estas obras estean listas”. O presuposto das obras ascende a 8.800 euros.

Ata o campo de herba natural da Marosa se desprazaron este mércores o alcalde, José Mª González Barcia e o concelleiro de Obras.