Unha sentenza anula o ERE da Fábrica Cerámica de Sargadelos

Unha sentenza do Xulgado do Contencioso-Administrativo de Lugo anula a resolución do Director Xeral de Relacións Laborais da Consellería de Traballo e Benestar da Xunta de Galicia con data do 27 de xaneiro de 2011 que aprobaba o ERE da empresa Fábrica Cerámica de Sargadelos SL.

Polo tanto, o tribunal recoñece o dereito dos traballadores afectados a ser readmitidos nos seus postos de traballo “co aboamento das cantidades deixadas de percibir en concepto de salarios dende as extincións dos seus contratos, así como a retroacción da alta co aboamento de cotas correspondentes dos traballadores na Seguridade Social no momento das extincións dos seus contratos”.

A CIG, como parte demandante, argumentaba que a fábrica forma parte dun grupo de empresas polo que consideraba “necesario coñecer o estado real económico e financieiro do grupo”. Tamén facían constar que consideraban “arbitraria” a designación de traballadores afectados, que “non existiu boa fe” nas negociacións da empresa cos traballadores previas ó ERE e que este “non se xustificou a nivel económico nin a nivel organizativo e de producción”.

A Administración, pola súa banda, negou as pretensións anteriores igual que a Fábrica CErámica de Sargadelos que alegou que “a causa económica quedaba acreditada polas perdas do 2010”. E as empresas codemandadas Sargadelos Coruña, Compostela, Barcelona, Cristal de Sargadelos, Porcelana de Sargadelos, Laboratorio de Industria e Conservación do Castro, tamén engadiron a “falta de lexitimación pasiva pola inexistencia do grupo de empresas”.

Comprobada a existencia do grupo empresarial a efectos laborais, ademais de mercantís, os tribunais consideran que para “a solicitude do ERE tiña que incluír unha referencia solvente de tódolos compoñentes do grupo”.

Coa anulación do ERE polo anterior motivo, tamén se analizou a xustificación da elección das persoas despedidas no ERE onde a Inspección de Traballo asegura que podería ser maior a reducción de traballadores despedidos dos 34 a 26 dun total de 115. Ademais, a Inspección alerta de que “non existe unha correspondencia total entre os postos sinalados e os finalmente escollidos dentro de cada sección”. E tamén que “os cambios non foron debidamente xustificados”.

Nese sentido, Inspección critica que os criterios que se dixeron empregados para a selección dos traballadores e traballadoras afectados (experiencia, productividade ou polivalencia) “son puramente formais; xa que non se achega ningún tipo de xustificación sobre o sistema empregado”. De feito, a sentenza recolle que “o informe elaborado pola CIG onde se describe o cadro de persoal clasificado por seccións discrepa do contido dos criterios dados pola empresa e a realidade reflectida no ERE”.

Con todo, a xustiza confirma a situación de “crise económica real e demostrada nos últimos anos no que a Inspección de traballo tampouco ten dúbidas”.