Ribadeo conta co sistema de xestión ambiental “máis potente” dos 10 concellos que o teñen implantado en Galicia

Ribadeo, 8 de abril de 2015. O Concello acaba de validar o Sistema de Xestión Ambiental EMAS, que leva implantado en Ribadeo desde hai anos. Este mércores o concelleiro de Medio Ambiente, Horacio Cupeiro, fixo balance e subliñou que o de Ribadeo “é o sistema máis potente dos 10 Concellos que o aplican en Galicia”.

O edil nacionalista explicou que “o noso Concello conta co Sistema de Xestión Ambiental máis potente de Galicia de entre os 10 que o teñen implantado. Son: Boiro, Boqueixón, Guitiriz, Muros, Poio, Ponte Caldelas, Santiago, Vilaboa e O Grove”.

Cupeiro subliñou que “hai pouco tempo acabamos de validar ese sistema, o sistema EMAX. Debido a que Ribadeo goza dunha saúde importante desde o punto de vista turístico, e que os ribadenses demostran a diario o seu bo comportamento ambiental vímonos na idea de consolidar a implantación do EMAX. Levamos desde o 2006, onde naquel momento so tiñamos implantado o sistema na oficina do concelleira e fomos variando e ampliando o seu alcance ata hoxe, ata o 2014”.

O concelleiro de Medio Ambiente indicou que “o sistema está promovido pola Unión Europea, conta co regulamento 1221/2009, é voluntario e o que pretende é concienciar ao cidadá para que todas as actividades que desenvolva as faga de maneira sostible co ánimo de que as xeracións futuras se encontren cun medio ambiente saudable, onde a biodiversidade non se vexa comprometida”.

Horacio Cupeiro dixo que “unha vez que desde a Xunta nos enviaron o rexistro da validación o Concello o que fixo foi colgar a declaración ambiental na páxina web. O sistema obríganos ter unha política municipal que está colgada con todas as dependencias onde está implantado ese alcance e ten uns obxectivos e un programa de xestión, que debe asegurar que cumprimos a lei, que melloramos ano tras ano, e tamén lle debemos dar información á veciñanza sobre todo o que estamos controlando para que saiban si o que están a facer está ben ou mal”.

A implantación deste Sistema de Xestión Ambiental “nos da un outorgamento cun distintivo que é recoñecido pola Unión Europea, tamén nos da un respaldo e recoñecemento doutras administracións coma o Estado, a Comunidade Autónoma, a Deputación ou outros Concellos; tamén nos obriga a conseguir cada ano melloras medio ambientais e tamén un aumento da competitividade. E temos un logotipo que nos acredita como Concello que ten implantado o sistema. Para poder gozar deste prestixio debemos ser supervisados por auditorías. Loxicamente hai dous tipos de auditorías, unha interna que che vai unha avaliación para detectar os fallos que estás a cometer, e despois hai auditorías externas que á súa vez os que a veñen facer teñen que estar acreditadas diante da ENA (Entidad Nacional de Acreditación)”.

Horacio Cupeiro sinalou que “a implantación do EMAS da unha garantía aos Concellos en canto a que están a cumprir coas normativas comunitarias. Temos implantado este Sistema de Xestión na Casa do Concello, no auditorio, na xestión de residuos, na Casa da Xuventude, na Casa da Ría, no Punto Limpo e tamén están metidas as praias de As Catedrais e As Illas-Castros co seu sistema de xestión ambiental propio”.

O concelleiro de Medio Ambiente de Ribadeo engadiu que “pode ocorrer que os veciños, como isto é algo árido, algo técnico, non se dean conta da importancia que ten o sistema, que nos obriga a ter un comportamento medio ambiental moi forte”. E puxo exemplos: “tivemos un caso co tanque de combustible da caldeira da Casa do Concello, que está na praza, e resulta que había que pasar unha serie de inspeccións que non pasaba ata hai 6 ou 7 anos, levando instalado desde o ano 1.980. Esas auditorías sacan á luz aquelas cousas que non se están a facer ben ou que se descoñecen e logo hai que tomar medidas e solucións para cumprir con todas as normativas vixentes. E hai que darlle explicacións á Unión Europea de que todo que se utiliza no Concello de Ribadeo está controlado e publicado na páxina web do propio Concello”.