Bernardo Fraga, asegura que “desenvolverá a Concellería do Mar, xa creada polo BNG no ano 2011, e que o PSOE diluiu inmediatamente despois”

Viveiro, 13 de maio de 2015. Bernardo Fraga, candidato á Alcaldía de Viveiro, presentou esta mañá o programa do BNG, para o Mar. Os nacionalistas, aseguran que recuperarán e desenvolverán a Concellería do Mar, que crearon por primeira vez no ano 2011, e que coa súa saída do goberno, o PSOE deixouna totalmente de lado, posto que nada se fixo nesta materia.

“A Concellería do Mar, ten que ser prioritaria nun Concello coma Viveiro, onde se sitúa un dos portos pesqueiros máis importantes do Cantábrico. Un bo goberno municipal, debe traballar man a man co sector, na súa defensa, e na difusión dos productos do noso mar” dixo Fraga.

Ademais, engadiu “alegrámonos moito de que o PP, incorpore no seu programa a creación desta concellería, unha aposta do BNG no 2011, pero lembrámoslles que xa existe, que deberían estar mellor informados antes de facer o seu programa, e que o problema está en que o PSOE non tivo interese ningún en desenvolvela”.

Ademais, os nacionalistas, aseguran que apostarán por recuperar as bandeiras azuis para as praias do Concello e garanten a limpeza habitual das praias durante o ano.

Bernardo Fraga, engadiu “Apostaremos pola recuperación da fachada marítima de Celeiro, impulsando o traslado do varadoiro dentro do porto e coa reforma da rúa do porto como prioridade, para rexenerar a Praia e os espazos públicos do entorno”.