Cervo rexistra unha taxa de paro do 8,36% no mes de marzo sendo o concello con menos desemprego da provincia

Cervo, 21 de maio de 2015.- O Concello de Cervo informou hoxe de que a taxa de paro no municipio no mes de marzo situouse no 8,36% segundo datos extraídos do Servizo Público de Emprego de Galicia. Desta maneira, Cervo é o concello da provincia de Lugo con menos desemprego e o terceiro de Galicia. Unha cifra que contrasta coa porcentaxe rexistrada no conxunto de España, do 23%.

A edil de Emprego, Yolanda Pedreira, valorou estas cifras, asegurando que “non nos satisfan, porque cando falamos de desemprego non existen datos bos”, pero “si que son esperanzadores” e “unha base sólida sobre a que seguir traballando para contribuír a reducir a taxa de paro”. Ao mesmo tempo, Pedreira explica que “non son datos puntuais, e que seguen unha liña descendente que se vén mantendo nos últimos anos”.