11 de xuño de 2015.- “Estaba claro que José López Orozco non ía ser o próximo alcalde. Sabiámolo todos, incluído el mesmo, Besteiro e todo o partido socialista. A renuncia de Orozco é unha fraude colectiva á cidadanía”. O Portavoz do GPP no Senado e Presidente do partido en Lugo fixo estas declaracións tras coñecer a renuncia de José Clemente López Orozco a ser candidato do PSOE á alcaldía e á súa acta de concelleiro.
A renuncia facilita un pacto de esquerdas entre Lugo Novo, o BNG e o PSdeG, que impedirá que o candidato do PP, Jaime Castiñeira, sexa investido alcalde o vindeiro sábado. Neste sentido, José Manuel Barreiro quixo recordar “que a lista de Castiñeira foi por segunda vez a máis votada e que son pactos de perdedores os que impiden que se cumpra o desexo da maioría dos lucenses”.
Barreiro afirmou que “queda demostrado que o Sr. Besteiro enganou a todos os cidadáns de Lugo. Esa -matizou o Presidente Provincial do PP- é a súa forma de facer política: mentir para conseguir beneficios persoais e políticos”. José Manuel Barreiro recordou que durante a campaña electoral tanto el como o propio Jaime Castiñeira “advertiron aos votantes de que o PSOE presentaba na cidade unha lista cun candidato pantasma” porque “estaba claro que Orozco non ía ser alcalde xa que nin Santiago Fernández Rocha nin Rubén Arroxo pactaría con el por estar imputado”.
O Portavoz do GPP no Senado manifestou que “trala renuncia de Orozco queda claro quen di a verdade e quen engana aos cidadáns”, en referencia ao líder dos socialistas galegos, José Ramón Gómez Besteiro, que ata fai poucos días mantivo firme o seu apoio a Orozco. Barreiro pídelle “ao Sr. Besteiro que non se oculte, que dea a cara e explique a todos os lucenses o seu engano”. “Un engano -dixo o Presidente do PP de Lugo- que foi premeditado e que viñeron xestando durante toda a campaña electoral e que hoxe, ante a negativa de Lugo Novo e BNG a pactar, terán que materializar”. “A Besteiro fáltalle valentía para dar a cara pero os cidadáns non son parvos e saberán ver cal é a súa forma de facer política. Se mentiron antes de gañar as eleccións que farán agora cando asuman o poder”, dixo José Manuel Barreiro.
O líder do PP de Lugo explicou que “non ten ningún sentido que unha persoa que non se presentou como cabeza de lista ás eleccións e nin sequera é da cidade -en referencia a Lara Méndez, ata agora candidata á alcaldía de Cervo- convértase este sábado na nova alcaldesa de Lugo”.
José Manuel Barreiro pide ao líder xefe de filas dos socialistas galegos “que actúe coa coherencia que tanto predica, que non continúe enganando aos lucenses, que rectifique e que deixe gobernar á lista máis votada”.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
