50 nen@s participan no programa “Repasando”, organizado pola Concellería de Educación de Cervo

Cervo, 7 de xullo de 2015.- Cincuenta nenos e nenas participan no programa denominado Repasando organizado pola Concellería de Educación de Cervo para que os escolares recorden o que aprenderon durante o curso.

A concelleira de Educación, Dolores García Caramés, anunciou hoxe que “esta semana comezou o programa Repasando, que é unha iniciativa educativa na que os nenos e nenas en idade escolar durante a tempada de verán dan un repaso ao que aprenderon durante o curso, segundo as súas idades. A idea é facer entretidos os dous días á semana nos que se imparte o programa, xa que aprenden e repasan xogando e visualizando os contidos para facer máis amenas as clases. Impártese en San Ciprián, na Casa do Mar, en horario de mañá, e tamén nas demais parroquias do concello, como Cervo, Castelo e Rúa, en horario de tarde. En total están anotados uns 50 nenos e nenas”.

Dolores García tamén comentou que “xa se fixo o ano pasado, cando tivo unha gran acollida, e esperamos que nesta edición sexa de igual maneira, porque estamos convencidos de que é unha forma de aprender divertíndose”.
A concelleira rematou explicando que “hai dous grupos: de Infantil e de Primaria. E, por exemplo, hoxe os de Primaria xogaron a detectives e tiveron que descubrir un caso policial descifrando pistas e calculando idades; e os de Infantil fixeron xogos de construción e puzzles”.