Fanto Fantini xa prepara a carreira solidaria “Alas de Vida 2015”

Baixo o lema ‘Non corras, voa!’ desenvolveranse entre o sábado 26 e o domingo 27 de setembro as carreiras solidarias “Alas de vida” 2015 en Burela.

Inspiradas no Reto Cébé no que o corredor de montaña Sebastien Chaigneau colabora con DEBRA e da asas a Nina Roma, a Asociación Cultural Fanto Fantini dalle vida no entorno mariñán da man de Quico Muñoz e Diego Franco co obxectivo de a coñecer a enfermidade “Epidermólisis bullosa” -máis coñecida como “Pel de Bolboreta”, recadar fondos para a Asociación DEBRA e informar e concienciar dos beneficios da actividade física.

O colectivo recorda que “Alas de Vida” é un exemplo de “como deporte e solidariedade combinan á perfección”; xa que “ao final do “Alas de Vida 2014″ recadáronse 7.602,48 euros que foron doados integramente á Asociación DEBRA”.

Programa
O sábado 26 de setembro desenvolverase o “Paseo solidario Alas de Vida” para fomentar o deporte a todos os ámbitos e grupos de idade. A ruta de 3 km entre a Praza da Mariña e a Marosa poderase completar de varias formas – andando, en patíns, en bicicleta, correndo…-. A actividade rematará cunha chocolatada con actividades para os máis pequenos na Praza da Mariña onde se poderán mercar produtos solidarios. O prezo da inscrición é de 3 euros.

O domingo 27 de setembro desenvolverase, con saída ás 11.00 horas dende a Praza da Mariña, a II Media Maratón de montaña Alas de Vida cun percorrido duro polos arredores de Burela e o seu litoral marítimo con 400 metros de desnivel acumulado.

O prezo da inscrición é de 15 euros e poderase realizar a través da páxina de Empa-T (www.empa-t.com) ou na propia praza ata 30 minutos antes do inicio da proba.