O Grupo Popular apoia no Parlamento galego instar á Unión Europea a mellorar a etiquetaxe dos produtos da pesca e marisqueo de orixe galega

Santiago, 18 de novembro de 2015.- O Grupo Popular apoiou este mércores na Comisión de Pesca do Parlamento de Galicia a adopción dun acordo unánime a través do que se insta á modificación dos regulamentos europeos para mellorar a etiquetaxe dos produtos da pesca e do marisqueo de orixe galega.

O portavoz do Mar, José Manuel Balseiro, defendeu que a normativa sobre etiquetaxe “debe ser o máis simple e fácil de interpretar que sexa posible” e lembrou que os actuais regulamentos comunitarios (que empregan ás denominacións xenéricas sobre as zona de captura da FAO) provocan no consumidor un nivel de desinformación maior, ata o punto de mesturar augas de distintos estados membros.

Balseiro asegurou que tanto o PPdeG como a Xunta “sempre defenderán a diferenciación dos produtos galegos, tanto durante o proceso de captura e transformación como durante a comercialización”. Neste sentido, lembrou que o Goberno galego impulsou un Regulamento autonómico sobre etiquetaxe dos produtos galegos e impulsa a etiqueta PescaDeRias ¿de onde se non?, que identifica a pesca fresca galega e está vixiante nos mercados para garantir a orixe galega do produto etiquetado como tal.

ACORDO PESQUEIRO CON PORTUGAL
Por outra banda, en relación cunha iniciativa do BNG, Balseiro defendeu que Xunta e Ministerio traballan no novo acordo de pesca con Portugal (que debe entrar en vigor o ano próximo, tras o remate do actual) co obxectivo de garantir un marco igualitario nas condicións de actividade de ambas flotas, en particular que os barcos lusos cumpran co descanso semanal obrigatorio.

Os deputados populares non apoiaron a iniciativa nacionalista porque sobre esta cuestión xa existe un acordo unánime de todas as forzas políticas parlamentarias, plenamente vixente, e que a propia Xunta defende en todas as reunións relativas á negociación deste novo convenio bilateral.

Balseiro dixo que “o BNG pretende facer crer que o Goberno galego estivo de brazos cruzados, cando a realidade é outra e a igualdade de condicións entre flotas é unha das demandas que con maior intensidade defenden, tanto a Xunta como Ministerio, nas reunións preparatorias que convoca a Secretaría General de Pesca e nas xuntas da Comisión bilateral de seguimento deste acordo, que se celebran periodicamente en Lisboa”.