A Mancomunidade de Municipios da Mariña coordinarase con outras institucións para loitar contra a avespa asiática e tratar de frear a súa expansión na comarca

Burela, 16 de decembro de 2015.- A Mancomunidade de Municipios da Mariña vai coordinar a partir de xaneiro, xunto a outras entidades, as labores para frear e erradicar a presenza de avespa asiática na comarca, que xa está causando importantes danos na produción dos apicultores, tal e como salientou Alfredo Llano.

O presidente da Mancomunidade subliñou que “hai moita preocupación, sobre todo nos produtores de mel, que vén que ano que pasa, ano que baixa a produción. Así que a nosa iniciativa vai ir co obxectivo claro que eliminar a importancia destas avespas asiáticas, para evitar que sigan facendo dano. Imos poñernos á labor e dentro das nosas responsabilidades e imos insistirlle a quen corresponda para tomar unha decisión conxunta e ben coordinada para ir pouco a pouco eliminando isto que nos pode traer consecuencias moi graves tanto na comarca da Mariña como noutros sitios”.

Este asunto abordouse no pleno da Mancomunidade celebrado o pasado luns: “o outro día falaban no Valadouro, que alí está afectando moitísimo, como tamén noutros lugares. Así que collémolo como un problema de responsabilidade conxunta e así o imos tratar. Esperamos que a partir do mes de xaneiro poidamos ir coordinando labores con determinadas institucións e organismos, como Tragsa, os bombeiros, Protección Civil, a comunidade científica, para eliminar e reducir a importancia desta avespa na nosa comarca”.