Ángeles Vázquez: “O futuro das producións agroalimentarias galegas pasa pola transformación para a súa posta en valor”

Santiago, 16 de decembro de 2015.- “A elaboración de produtos lácteos distintos do leite líquido ofrece aos gandeiros unha fonte de ingresos segura e rendible. O futuro pasa pola transformación”. Así o afirmou a conselleira do Medio Rural, Ángeles Vázquez, na entrega dos premios da XVIII Cata dos Queixos de Galicia e da XIV Cata dos Meles de Galicia, que tivo lugar este mércores ao mediodía en Santiago.

Neste contexto, Ángeles Vázquez destacou os datos de facturación das 72 queixerías galegas amparadas baixo os consellos reguladores, que produciron en 2014 máis de 5.000 toneladas de queixo, cun valor económico estimado de máis de 31 millóns de euros. Tamén, no caso do mel amparado pola Indicación Xeográfica Protexida, cunha produción que o ano pasado superou os dous millóns de euros.

Para apoiar estas producións, a titular de Medio Rural lembrou que “dende a Xunta traballamos para aumentar o valor engadido dos nosos produtos facilitando a súa capacidade de exportación”. Para isto, sinalou, “estamos a contribuír na organización colectiva dos agricultores, incentivando a relación territorial da produción, transformación e comercialización dos produtos agrícolas, particularmente a través da promoción de cadeas curtas de comercialización e do apoio á investigación, innovación e desenvolvemento de novos produtos agroalimentarios”.

Seguindo con esta reflexión, a conselleira apuntou que “malia o prestixio que os nosos produtos teñen nos mercados e entre os consumidores, o sector produtor agrario ten importantes carencias e dificultades estruturais que lles dificulta o acceso aos mercados”. E engadiu que “a pequena dimensión empresarial e a falta de integración son os factores que máis limitan o seu acceso aos mercados nacionais e internacionais dunha forma competitiva. Por iso é fundamental desenvolver actuacións pra promover a comercialización dos produtos agroalimentarios galegos”.

Plan de promoción
Nesta liña, indicou que “vaise dar máis pulo ao Plan especial de promoción agroalimentaria para acometer as accións promocionais directamente executadas pola Consellería do Medio Rural: campañas publicitarias, asistencia a feiras, organización de distintos eventos como catas de viños, de augardentes, de queixos, etc., e tamén as que realizan directamente tanto os Consellos Reguladores como as asociacións sectoriais”.
Malia todo, advertiu Ángeles Vázquez, “estamos a falar dunha industria que factura 4.721 millóns de euros anuais e emprega a preto de 20.000 persoas en Galicia, o que supón o 16,4% da facturación total e o 15% do emprego total da industria galega”.

Na súa intervención, a conselleira salientou tamén a importancia da gastronomía galega como “elemento transcendental da nosa forma de ser” e engadiu que Galicia non podería entenderse sen a nosa cociña e, en concreto, “sen o noso queixo e os nosos meles”. E rematou pedindo a complicidade dos consumidores para que “consumamos produtos de Galicia por moitos motivos, para cooperar no crecemento económico da nosa terra, para poñer en valor o noso pero, sobre todo, porque están boísimos!”, remarcou.

RELACIÓN DOS PREMIADOS

XVIII CATA DOS QUEIXOS DE GALICIA – 2015

D.O.P. QUEIXO TETILLA

1º POSTO E DISTINCIÓN DE OURO: “DANIBERTO” – Daniberto, S.A.T. (Vilalba – Lugo)

2º POSTO E DISTINCIÓN DE PRATA: “BO QUEIXO” – José Castro Tejo (Boqueixón – A Coruña)

3º POSTO E DISTINCIÓN DE BRONCE: “QUEINAGA” – Queinaga, S.A.T. (Curtis – A Coruña)

4º POSTO E DIPLOMA: “TERRA DE MELIDE”– Lácteos Terra de Melide, S.L. (Melide – A Coruña)

5º POSTO E DIPLOMA: “RUTA XACOBEA” – Alimentos Ruta Xacobea, S.L. (O Pino – A Coruña)

6º POSTO E DIPLOMA: “MOECHE” – Lácteos de Moeche, S.L. (Moeche – A Coruña)

D.O.P. ARZÚA-ULLOA

1º POSTO E DISTINCIÓN DE OURO: “BO QUEIXO” – José Castro Tejo (Boqueixón – A Coruña)

2º POSTO E DISTINCIÓN DE PRATA: “RUTA XACOBEA” – Alimentos Ruta Xacobea, S.L. (O Pino – A Coruña)

3º POSTO E DISTINCIÓN DE BRONCE: “PAZO ANZUXAO” – Lácteos Anzuxao, S.L. (Lalín – Pontevedra)

4º POSTO E DIPLOMA: “QUEINAGA” – Queinaga, S.A.T. (Curtis – A Coruña)

5º POSTO E DIPLOMA: “ARQUESÁN”– Agro Despensa, S.L. (Touro – A Coruña)

6º POSTO E DIPLOMA: “ARTELAC” – Antonio Ferreiro Ferreiro (Antas de Ulla – Lugo)

D.O.P. ARZÚA-ULLOA CURADO

1º POSTO E DISTINCIÓN DE OURO: “BARRAL” – Queixería Barral, S.L. (Arzúa – A Coruña)

D.O.P. SAN SIMÓN DA COSTA

1º POSTO E DISTINCIÓN DE OURO: “DON CRISANTO” – Crisanto, S.A.T. (Vilalba – Lugo)

2º POSTO E DISTINCIÓN DE PRATA: “PRESTES” – Queixería Prestes, S.L. (Vilalba – Lugo)

3º POSTO E DISTINCIÓN DE BRONCE: “CASLEIRAS” – Queixería Cas Leiras, S.L. (Vilalba – Lugo)

D.O.P.CEBREIRO

1º POSTO E DISTINCIÓN DE OURO: “CASTELO” – Castelo de Brañas, S.L. (Pedrafita do Cebreiro – Lugo)

XIV CATA DOS MELES DE GALICIA 2015

CATEGORÍA A: MELES MONOFLORAIS

1º POSTO E DISTINCIÓN DE OURO: “ALFIMEL” – Josefa Paz Vizoso (Burela – Lugo)

CATEGORÍA B: MELES MULTIFLORAIS

1º POSTO E DISTINCIÓN DE OURO: “BARBANZA MEL” Abelleiros Fidosa, S.L. (Porto do Son – A Coruña)

2º POSTO E DISTINCIÓN DE PRATA: “O TROBO MEL DO VALADOURO” – María Fe Sixto Pernas (O Valadouro – Lugo)

3º POSTO E DISTINCIÓN DE BRONCE: “MEL DE MONFERO” Josefa María Durán Casal (Monfero – A Coruña)

4º POSTO E DIPLOMA: “MEL O TESTEIRO” – María Munín Taboada (Lalín – Pontevedra)

5º POSTO E DIPLOMA: “ALFIMEL” – Josefa Paz Vizoso (Burela – Lugo)

6º POSTO E DIPLOMA: “MEL DO SALDOIRO” – Antonio Gómez Tapia (Lalín – Pontevedra)