Os populares aseguran que o desplome electoral do BNG é un castigo dos lucenses ao desastroso papel dos nacionalistas no Goberno da Deputación de Lugo

Lugo, 23 de decembro de 2015.- O secretario xeral do Partido Popular de Lugo, Jose Manuel Balseiro, atribuíu o desplome electoral do Bloque Nacionalista Galego –a través da candidatura Nós- acontecido nas últimas eleccións xerais ao “desastroso papel” que esta formación política está a adoptar na Deputación de Lugo.

Os nacionalistas tan só obtiveron 7.208 votos dos lucenses -un 3,6% do total do electorado-, unha porcentaxe inferior case nun punto á media galega acada por esta coalición nacionalista, xa de por si baixa.

Balseiro di que no BNG non foron quen der rendibilizar os oito anos de Goberno bipartito da Deputación de Lugo e, proceso electoral, tras proceso electoral, están a perder apoios entre os lucenses, ata o punto de que hoxe estaría fóra da Deputación.

EN SETE MESES PERDEU O 70% VOTOS
De feito nas últimas eleccións municipais o BNG perdeu ata tres alcaldías que gobernaban, as de Monforte, Mondoñedo e Riotorto e, nos últimos sete meses, os nacionalistas deixáronse 18.932 votos, máis dun 70% do seu apoio.

A situación contrasta co Partido Popular que entre as eleccións municipais do pasado mes de maio e as xerais do pasado domingo veu incrementados os seus apoios en 7.631 votos.

O BNG PERMITE UN GOBERNO CON IMPUTADOS
O secretario xeral dos populares di tamén que os lucenses non entenden o cambio de criterio imposto polo BNG para permitir que a Deputación de Lugo teña agora un goberno con presenza de deputados imputados aplicando un criterio ético de quita e pon, que cambia en función dos intereses dos seus deputados.

Balseiro cre que os actuais responsables do BNG na Deputación, de seguir coa súa estratexia converterán ao BNG nunha forza residual na provincia, sen representación real nas institucións, como xa perderon os seus asentos no Congreso dos Deputados.