“Ser produtores de enerxía ten que reverter nas veciñas e veciños como ocurre en Muras” dixo Olalla Rodil

Muras, 15 de decembro de 2015.- Olalla Rodil, candidata ao congreso por Nós-Candidatura Galega, achegouse ao concello de Muras que é un dos maiores produtores de enerxía eléctrica grazas á implantación de varios parques de aeroxeneradores. “A produción enerxética ten que reverter positivamente nas veciñas e veciños e Muras vaise converter nun referente estatal na xestión dos recursos grazas á presenza do BNG no goberno municipal” dixo Olalla Rodil que estivo acompañada de Xabier Vence, protavoz nacional do BNG, Manuel Requeixo, alcalde de Muras e Xosé Luis Rivas “Mini”, candidato ao Senado.

Nós-Candidatura Galega aposta por unha tarifa eléctrica galega que suporía unha redución do 30% na factura eléctrica e garantiría, por exemplo, a permanencia de ALCOA. A candidata ao congreso sinalou que “somos un país que exporta enerxía pero os beneficios vanse a outras partes do estado e as empresas tributan en Madrid” e engadiu que “o feito de que o noso territorio sexa un dos que máis enerxía produce debería ter un retorno para a poboación, esto é posible e en Muras comprobamos como se poden implementar medidas para que sexa así”.

Olalla Rodil explicou que o concello de Muras, gobernado polo BNG, será un dos primeiros do estado nos que o concello asuma o pago da factura eléctrica dos seus veciños e veciñas grazas aos ingresos derivados da produción eléctrica que se dá no propio territorio. Olalla Rodil lembrou que “en Euskadi xa se benefician dunha tarifa propia que amortiguou os efectos do encarecemento da electricidade nestes últimos anos”.

Xuntanza con emigrantes retornados en Burela e mitin en Mondoñedo
Durante a xornada deste domingo Olalla Rodil participou, en Burela, nunha xuntanza con persoas afectadas polas reclamacións económicas que a facenda española está a realizar a emigrantes retornados. Pola noite foi no concello de Mondoñedo onde a candidata do Nós Candidatura Galega pechou a xornada cun acto público no que presentou o programa electoral da formación e estivo acompañada da canidata pola mariña Montse Porteiro e o candidato ao Senado Orlando González.