Lugo, 8 de febreiro de 2016.- A candidata á presidencia do Partido Popular de Lugo, Elena Candia, anuncia que creará xuntas comarcais cuxa composición será escollida en elección directa por todos os militantes. Solicitará autorización á Xunta directiva do PPdeG –como marcan os estatutos- para convocar sete congresos comarcais (Lugo, Terra Chá, Monforte, Chantada, Sarria, A Mariña e A Montaña) nos que cada afiliado escollerá un presidente e á súa executiva.
Candia explica que deste xeito se lle dará nova vitalidade ás estruturas comarcais do partido. “Unha das propostas que queremos trasladar aos nosos afiliados –e que responde tamén a moitas das demandas que nos fixeron chegar desde o distintos concellos para mellorar a noso funcionamento interno– é dar unha nova vitalidade ás estruturas comarcais do Partido Popular”.
Máis participación, máis dinamismo
A ex presidenta da Deputación considera que esta pode ser unha modificación fundamental para facer un partido máis dinámico, máis participativo, ao tempo que moito máis operativo, respectando sempre as estruturas locais xa existentes e a súa autonomía de funcionamento.
Elena Candia abunda nas vantaxes que tería esta estrutura comarcal. “Permitirá que gañemos en participación: A elección directa polos afiliados dos coordinadores e o funcionamento periódico das estruturas comarcais supón un avance notable na súa implicación na vida interna do partido”, explica.
En segundo lugar, permitirá gañar en transparencia. “Os afiliados serán protagonistas en primeira persoa no proceso de toma de decisións e, estas estruturas son ideais para que os distintos cargos poidan dispoñer dun foro directo para explicar a xestión nas distintas administracións e, polo tanto, realizar a correspondente rendición de contas”.
A terceira das vantaxes sería a de conseguir un partido máis pegado ao seu territorio. “Son estruturas ideas tamén para a coordinación, valoración, debate e proposta de iniciativas, porque moitas veces hai asuntos que transcenden o ámbito local e que merecen a nosa atención”, engade.
O afiliado debe recuperar o protagonismo
A candidata precisa que non se trata de crear máis órganos de dirección, pois os coordinadores comarcais xa existen, pero neste caso serán os afiliados os que, de xeito directo, escollan aos integrantes da súa Xunta Comarcal, incluído o presidente.
“Os afiliados esixen renovación e cremos que cando o demandan están pensando en pasos coma este que contribúen a acadar novas ideas, novos equipos e máis participación. Estannos reclamando cambios nas formas de facer política, nas actitudes no propio discurso político cunha única finalidade: manter e incrementar o respaldo cidadán que de sempre ten caracterizado ao noso partido, e que o converteron na primeira forza política nesta provincia”, indica.
Así, estas novas estruturas comarcais permitirá consensuar con eles, en primeira persoa, cara a cara, cales deben ser as liñas de actuación das administracións nas que temos presenza institucional e os nosos programas para este ano electoral. O afiliado debe recuperar o protagonismo e por iso imos multiplicar os procesos de participación para facer un PP máis aberto e plural.