O Concello de Burela colocará un sistema de protección para evitar que o barco museo Reina del Carmen se golpee contra o muro do peirao

Burela, 3 de marzo de 2016.- O alcalde, Alfredo Llano, mantivo xuntanzas este xoves en Lugo con responsables de Portos de Galicia, de Costas e da Deputación para abordar cuestións de interese para o Concello.

O rexedor contou que “estiven en Portos de Galicia para facerlles unha petición para unha cuestión que nos parece moi importante, pois o barco museo está situado contra o muro do peirao e cremos que as deformacións que ten no casco son causadas por golpes que se dá contra o muro. Entón fómoslle pedir a instalación duns amortiguadores para colocar entre o muro e o barco e así evitar que se golpee. Hai uns de caucho moi ben preparados que son efectivos, pero só hai unha fábrica que os fai, que está en Bilbao, e ademais non son moi baratos, polo que imos intentar colocar tres. Van mirar a ver se é posible”. Llano dixo que “mentres non teñamos eses, que son os mellores que hai hoxe, imos poñer un rosario de pneumáticos para tratar de amortiguar os golpes do barco museo contra o muro do peirao como consecuencia das sacudidas do mar”.

Xa en Costas o alcalde burelés foi falar dunha serie de danos ocasionados polos temporais no paseo da Marosa e noutros puntos do litoral do municipio. Alfredo Llano explicou que “unha das obras que se vai acometer enseguida na Marosa, nunha zona onde caeu parte do muro, concretamente fronte ao campo de fútbol, vaise colocar un valado con material de aceiro inoxidable para que as ondas do mar non rompan alí senón que pasen sen bater e romper o muro. Hai que substituílo porque senón vemos que cada vez que se repara o muro cando ven un temporal algo forte volve tombalo. Tamén na Marosa hai unha escollera bastante grande, na que todos os anos hai que recolocar as pedras; e agora vaise facer enseguida de novo ese traballo para recolocar as pedras que se soltaron ademais de agrandar un pouco esa escollera. E tamén se van reparar en breve todos os danos que causaron os temporais no paseo, onde se romperon e se soltaron algunhas pedras. Ademais falamos da mellora de zonas recreativas, como no Cantiño, e tamén vamos seguir cun proxecto que temos para O Portelo, onde cremos necesario facer unhas instalacións con servizos sanitarios e un almacén para gardar o material dos socorristas e de salvamento”.

Finalmente o alcalde relatou que “na Deputación estiven para abordar a solicitude de obras, como a reposición e mellora de rúas. Tamén queremos que nos axuden nunha cuestión importante como é a xestión de residuos para o cálculo e a fórmula para mellorar a recollida de lixo en tódolos aspectos: tanto nos custes como nos métodos e nos materiais. Para iso pedimos que a Deputación nos faga un estudio”.