O Concello de Mondoñedo traballa para garantir, a través do seu control, o bo funcionamento dos servizos de abastecemento de auga e de saneamento

Mondoñedo, 24 de maio de 2015.- A alcaldesa de Mondoñedo, Elena Candia, e o edil de obras, José Otero Rejes, están a manter reunións mensuais con responsables da empresa Aqualia, encargada da xestión dos servizos de auga e saneamento no municipio co obxecto de garantir a súa prestación nas mellores condicións e na procura de solucións aos problemas existentes.

En concreto, a rexedora da localidade explica que dende o Goberno local “estamos a facer un seguimento moi de preto” a estes servizos coa finalidade de coñecer as condicións de “limpeza dos sumidoiros, de mantemento de bocas de rego e de solución dos problemas en abastecementos de auga”.

Elena Candia defende a “enorme” importancia de levar a cabo esta xestión dun “xeito eficaz”, xa que as consecuencias derivadas “son evidentes na localidade, froito do deficiente mantemento que levou a cabo o anterior equipo de Goberno bipartito. Unha situación coa que sempre fomos moi críticos”.

Neste senso, a alcaldesa pon como exemplo os problemas existentes na rede de saneamento da parroquia de Sasdónigas, que “nunca chegou a funcionar, despois dunha elevada inversión de fondos públicos”. De feito, Candia explica que o deseño do proxecto é “tan inviable, que impide o acceso á depuradora para proceder ao seu mantemento”. “É un claro exemplo da falta de control dos nacionalistas e dos socialistas no Concello de Mondoñedo”, matiza.

Esta falta de xestión do anterior Goberno bipartito contraponse a do novo executivo de Candia, quen enumera que “levamos limpado máis de 140 sumidoiros e corrixido un importante número de deficiencias”, pese a isto, aclara, “queda moito traballo por facer e están previstas novas actuacións”.