Fernán Vello: “Están ameazando o benestar económico e social da Mariña. É urxente salvar a comarca”

Ribadeo, 17 de xuño de 2016.- En Marea presentou, na tarde do venres na Antiga Oficina de Turismo de Ribadeo, a algúns dos seus membros da lista ás Cortes pola provincia de Lugo. Neste acto reuníronse membros das candidaturas ao Congreso e ao Senado e dialogaron con arredor de vinte veciñas e veciños que se achegaron a escoitar a propostas e conversar sobre a situación política da provincia e do conxunto do estado. O acto, presentado por Natalia Prieto (secretaria de medio rural de Podemos en Galiza) estendeuse máis dunha hora de duración e introduciuse coa problemática das enfermidades invisibilizadas e a cuestión da saúde pública na actualidade. Ela mesma falou no sentido “de preservar e ampliar o espazo plural que estamos construíndo, que pon todo o que temos en común, por riba das diferenzas que poidamos ter entre forzas diferentes. O señorito dos Peares identifícanos coa Complutense de Madrid. Pois non: somos daquí, pisamos esta Terra, e defendemos a este país e á súa xente. E na miña zona, que son do interior, tamén está chegando a marea”. Estaba entre os presentes Isabel Vilalba, Secretaria Xeral do Sindicato Labrego Galego.

Miguel Anxo Fernán Vello, candidato nº1 ao Congreso, apuntou que: “É fundamental para a economía e a sociedade da Mariña. Están ameazando o benestar e a economía desta bisbarra. Esta alianza fraterna fai súas as reivindicacións do Comité de Empresa. É urxente salvar a comarca”

Participaron tamén do acto Carlos Portomeñe (concelleiro de ACE en Lugo), Modesto Renda (concelleiro de Vilalba Aberta, e candidato ao Senado) , Jose Manuel Pérez Afonso (número 3 ao Congreso) e Iñaki García (concelleiro de Lugonovo no Concello de Lugo):

Carlos Portomeñe dixo ante os presentes que: “hoxe en día prodúcese un arrinconamento da palabra público: a agresión que están levando a cabo marca absolutamente todo o funcionamente das institucións desde o primeiro nivel. É precisamente o público o que hai que recuperar. O público é de todas e todos, e o privado en mans duns poucos que é o berce da corrupción. Necesitamos unha lei de remunicipalización e a derrogación da normativa actual. Neste país dase moita información de Venezuela, e moi pouca de Francia, por exemplo. O gran mérito de organizacións coma En Marea é a construción dunha unidade que acabará sendo maioría parlamentaria. Aquí hai un proxecto xenuinamente galego que é En Marea. Fóra de Galicia é Unidos Podemos a nosa forza fraterna”

Iñaki García: apuntou que “o 26X temos que votar en Marea porque temos o deber de botar a Mariano Rajoy canto antes. Encheremos milleiros de urnas con millóns de votos para conquerir un goberno que represente á maioría social e que coide, tamén, o ecosistema. A realidade do cambio climático, da que ultimanente pouco se fala, require tamén respostas inmediatas dos gobernos: redución do consumo eléctrico e a substitución dos combustibles fósiles pola economía verde. Tamén pola economía circular e a reciclaxe. Opoñémonos ao fracking. Isto é o futuro inexorable, porque o planeta está en risco. Hai que mudar o paradigma. E queremos decidilo todo, tamén aquí”

Modesto Renda, dixo que “a diversidade da xente e das tradicións políticas que representamos fainos sentir a todas e todos partícipes dun proxecto común para este país. Son dos convencidos de que se aceptamos a linguaxe do inimigo, coma mercados, quedámonos na indefinición. Eles teñen nomes e apelidos: Alierta, Fainé, Brufau, González…ese, os mercados, son os que lexislatura tras lexislatura dan ordes renovadas aos monicreques de turno. Nós reunímonos. Eles agóchanse detrás dunha marca, do monopolismo e da incapacidade de facer negocio sen a axuda do estado, que se enriqueceron durante a crise. Son uns impresentables. E unímonos para propoñer unha sociedade alternativa á que eles nos impoñen. Nos non facemos promesas, senón garantías poñéndonos límites a nós mesmas”

José Manuel Pérez Afonso indicou que “o que fai mellores a En Marea é que somos moi diferentes. Na nosa variedade ideolóxica está a riqueza. Temos que ter cousas certas cousas claras, coma que non pode estar o lucro por riba dos dereitos humanos. Ou que a xestión ten que estar feita por profesionais. Estamos aquí porque os que racharon o pacto de convivencia e nos defraudaron, aos que unicamente traballamos e intentamos ser honrados, nos obrigan a estar”