O BNG de Cervo cre que “a sentenza do Tribunal Supremo obrigando a indemnizar a unha promotora é froito da actuación neglixente do PP no goberno municipal para beneficiar intereses privados e non os públicos”

Cervo, 10 de novembro de 2016. A sentenza do 29 de outubro de 2016 do Tribunal Supremo que permite a Promociones San Ciprián S.L reclamar indemnizacións pola paralización esixida pola Xunta en 2010 da construción de 100 vivendas por afectar ao Castro da Atalaia en San Cibrao é froito da neglixencia na xestión urbanística do goberno municipal do PP, quen tendo coñecemento con anterioridade da existencia dun xacemento arqueolóxico na zona non tivo reparos en conceder licenzas de construción para beneficiar intereses privados en non os públicos, protexendo o Castro da Atalaia como era a súa obriga.

O PP, no goberno municipal, concedeu licenzas de construción a pesar de coñecer a existencia de restos arqueolóxicos na zona
Tal como especifica a sentenza do Supremo, o concello coñecía a existencia dun xacemento arqueolóxico desde 2005, cando lle foi comunicado o seu inventariado con motivo das catas ordenadas por Patrimonio nunha construción promovida polo concello na zona. A pesar disto en decembro de 2006 e abril de 2007, o goberno municipal do PP, non dubidou en conceder licenzas de construción para 100 vivendas, nin tan sequera paralizou as obras cando nas primeiras escavacións para cimentar un dos tres edificios apareceron restos arqueolóxicos, permitindo á promotora esbandallar parte do Castro da Atalaia e depositar os restos nun entullo a varios quilómetros, ate que activistas do BNG e veciñanza paramos os camións e chegou unha orde de Patrimonio para paralizar a desfeita.

O portavoz municipal nacionalista lembra que “mesmo antes do 2005, en 2004 con motivo aprobación polo pleno da corporación da exposición pública do avance PXOM, xa se documentaba a existencia dun xacemento arqueolóxico na zona, polo que o goberno do PP non podía alegar descoñecemento no momento de concesión das licenzas de construción.

Cada euro que agora se pague á promotora, como antes, cada muro destruído do Castro da Atalaia, son froito da neglixencia do goberno municipal
A actual sentenza do TS permitirá á promotora con dereitos urbanísticos na zona concedidos polo goberno municipal en decembro de 2006 e abril de 2007, “reclamar indemnizacións tanto ao concello de Cervo como entidade administrativa que concede o dereito de construír e recibe ingresos a cambio por estes permisos, como tamén á Xunta de Galiza que a obriga a realizar estudos arqueolóxicos, realizar actuacións de protección do xacemento descuberto e paraliza a construción dos edificios previstos”, valoraron desde o BNG.

“As cantidades que agora sume a indemnización á promotora, págueas o concello ou a Xunta, é diñeiro público perdido froito da neglixencia e mala praxe dun goberno municipal mai preocupado por protexer intereses privados que publicos”, ao que se deberá sumar a perda do valor patrimonial da parte do Castro “esbandallada co permiso” do goberno local, afirmou Bernardo Insua.

BNG –AA pedirá ao goberno municipal que informe sobre as consecuencias da sentenza para o concello a curto e medio prazo
O BNG pedirá ao goberno municipal que informe de maneira detallada sobre as consecuencias económicas ou de outra índole que ten esta sentenza para o concello de Cervo. A formación nacionalista reitera que a responsabilidade sobre a concesión dos dereitos urbanísticos finalmente perdidos sobre ese terreo pola promotora son exclusivamente municipais, polo que compre coñecer con antelación todas as consecuencias que poda ter a curto e medio prazo.