Suárez Barcia asina en Santiago o acordo de colaboración na campaña ‘Concellos en negro contra a violencia de xénero’

Ribadeo, 17 de novembro de 2016. O alcalde, Fernando Suárez, asinou este xoves en Santiago de Compostela o acordo de colaboración cos 15 Concellos que participan na campaña Concellos en Negro contra a violencia de xénero, que da comezo este venres 18.

O rexedor ribadense manifestou que “con moita humildade, pero con toda a potencia e a ilusión Ribadeo tamén é un destes Concellos que acabamos de asinar este documento de colaboración aquí en Santiago de Compostela baixo o lema de Concellos en Negro contra a violencia, é dicir Ribadeo contra a violencia de xénero”.

Fernando Suárez subliñou que “o obxectivo é seguir traballando o tema, traballando contra esta lacra social. Ribadeo xa leva moitos anos traballando con excelentes profesionais, cos centros de ensino, traballando con todos os sectores educativos e sociais, pero agora tamén coordinados con outras forzas de ámbito local, con outros poderes locais, como varias cidades e varios Concellos de todo o país que levamos a cabo actuacións, porque isto ten que ser unha tarefa de todos”.

O alcalde declarou: “sabemos que tal vez desde o poder local non temos a potestade para cambiar as leis, pero temos a potestade para unirnos e para unificar a nosa voz para que sexa un paso máis para traballar e combater esta lacra que segue matando mulleres todos os días desgraciadamente. Se iso acontece é que algo non funciona, e que as leis quizais haxa que revisalas para que isto non sexa algo habitual, que haxa violencia de xénero como está habendo”.

Suárez Barcia salientou que “estas iniciativas, que o outro día a miña compañeira Mariluz Álvarez Lastra presentaba aquí en Ribadeo xunto a outros representantes de Acisa e doutros colectivos implicados, implicarán que a partir de mañá moitos comercios e locais estean adheridos así como centros educativos, o centro de saúde, en definitiva todos os sectores da cidadanía, económicos e tamén como non da administración local, estamos traballando todos a unha para que isto oxalá dentro de pouco soamente sexa pasado”.