O equipo de goberno levará ao pleno deste xoves a creación dunha praza de técnico de xestión medio ambiental, “moi necesaria debido ao dinamismo de Burela”

Burela, 4 de abril de 2017. O equipo de goberno levará ao pleno ordinario deste xoves, 6 de abril, a creación dunha praza de técnico de xestión medio ambiental e a amortización anticipada de 400.000 euros do préstamo do plan de pago a provedores.

O alcalde, Alfredo Llano, explicou que “é un pleno que leva varios puntos, pero eu destacaría basicamente tres. Un deles é a amortización anticipada do préstamo de refinanciación do que é o plan de pago a provedores. Xa adiantáramos o ano pasado unha cantidade importante e que imos rematar agora xa. Neste pleno imos aprobar a amortización de case 400.000 euros que quedaban pendentes desta débeda”.

Para o rexedor burelés “é importante que o Concello de Burela vaia pouco a pouco sacando adiante os préstamos que tiña concedidos, deste xeito iremos pouco a pouco reducindo a débeda, e conseguiremos que sexa un Concello ben saneado e que todo iso repercuta nunha mellora evidente para os veciños e as veciñas de Burela”.

Alfredo Llano salientou que “outro punto que imos tratar, que tamén consideramos que é moi importante, é a modificación puntual da relación de postos de traballo, para poder crear o antes posible, porque nos fai moita falta no Concello de Burela, unha praza de técnico de xestión que leve os temas de medio ambiente e relacionados con urbanismo. Vai corresponder ao grupo A2 e terá atribucións profesionais importantes como son a relación de informes vinculantes. É moi necesario porque en Burela debido ao seu dinamismo, cremos que é unha praza que hai que cubrir o antes posible. E relacionado con este tema temos tamén que facer unha modificación de crédito para dotar economicamente a esta praza de técnico de xestión medio ambiental”.