Ribadeo, 7 de xuño de 2017. Doce mestres de Apaga (Asociación de Profesores de Automoción de Galicia) participan estes días nas últimas saídas formativas da tempada en Holanda, en Italia e en Estonia. Fano ao abeiro do programa Conocimiento y Formación para la Empleabilidad.
Catro profesores atópanse en Utrecht (Holanda) do 5 ao 11 de xuño, onde visitan centros de ensino, empresas e cidades como Amsterdam. Outros catro mestres están nas mesmas datas en Pontevico (Italia) cun programa formativo coordinado pola empresa de acollida Multicar, con actividades de visita a centros educativos, a empresas como Spanesi, Ducati, Lamborlli e a diversos museos de vehículos clásicos. Nesta saída realizan tamén encontros con profesores de Bressia sobre o fracaso e o abandono escolar na FP. E outros catro profesores de Apaga atópanse do 5 ao 9 de xuño en Kuressaare (Estonia), onde acoden a coñecer empresas relacionadas coa automoción e tamén a centros de ensino.
Apaga está a aproveitar estas viaxes para dar a coñecer os atractivos turísticos do norte de Lugo, dentro do proxecto de internacionalización no que leva meses traballando. Álvaro Doural, o seu presidente, subliña que “estamos a distribuír nestas saídas formativas do profesorado exemplares da guía The North of Lugo, editada por esta asociación e por Faro Norte Comunicación”. Os encantos do norte da provincia de Lugo xa chegaron a países como Francia, Dinamarca, Croacia, República Checa, Portugal, Finlandia, Alemaña, Austria e agora a Holanda, Italia e Estonia.