Comunicado da xunta de persoal da área sanitaria da Mariña

A Mariña 3-10-17. Dende a Xunta de Persoal da Área Sanitaria da Mariña facemos un chamamento a toda a comarca da Mariña na defensa da sanidade pública, desde a vocación de aglutinar a toda a sociedade independentemente das nosas ideas políticas.

A veciñanza da Mariña debe ser consciente da magnitude deste desafío, necesita unirse e pronunciarse en defensa duns dereitos sanitarios gañados con esforzo por xeracións e dun futuro solidario, no que a Sanidade Pública e a nosa Área Sanitaria son irrenunciables.

Non podemos consentir, que se xogue co futuro dos nosos veciños, dos nosos maiores e dos nosos fillos. O noso obxectivo é a defensa da sanidade, unha sanidade pública de calidade e de proximidade.

E por iso, animamos a toda a cidadanía a loitar xuntos e organizados contra os recortes indiscriminados que se están aplicando, que só atenden a criterios económicos, así como, a NON permitir que se elimine a nosa área, a Área Sanitaria da Mariña.

Por todo o anterior, esta Xunta de Persoal fai un chamamento a toda a sociedade para saír unida á rúa este xoves de 5 outubro e participar na mobilización cidadá convocada pola Plataforma na Defensa da Sanidade Pública da Mariña.