Alumn@s de 6º de infantil do CEIP Virxe do Carme achegáronse ao mundo do mar e aos seus oficios. Fixérono acompañados das monitoras de Gaia do Concello burelés

Burela, 28 de novembro de 2017. Onte, luns, as monitoras de Gaia do Concello burelés acompañaron aos alumnos de 6º de Educación Infantil do CEIP Virxe do Carme a unha excursión. “O obxectivo desta era achegar aos rapaces ao mundo do mar e dos oficios relacionados con el. Visitamos o porto de Burela, coñecemos os distintos tipos de embarcacións, artes de pesca, souberon para que serve a fábrica de xeo, visitamos ás redeiras e achegámonos ao seu traballo, e por último, visitamos a cetárea Burela, onde os rapaces o pasaron xenial coñecendo distintos mariscos da zona”, explican desde Gaia.
A concelleira de Medio Ambiente, Noelia María Ben, subliñou que “desde este departamento queremos seguir apostando polo coñecemento do noso pobo, as nosas tradicións, e como non pode ser doutro xeito, tratándose de Burela, un pobo pesqueiro por excelencia, do mundo do mar. É moi importante coñecer todo o que nos rodea dende moi pequenos, aprender a valoralo, e así deste xeito, aprender a respectalo e a ser máis sostibles no noso día a día”.