O Piragüista focense Xoel García recibiu un recoñecemento do Concello este mércores nas instalacións do Club Kayak

Foz, 28 de marzo de 2018. O piragüista focense Xoel García Neira recibiu un recoñecemento do Concello de Foz con motivo da súa recente proclamación como campión de España sub17 e subcampión sub 18. Ao acto, que se celebrou esta tarde nas instalacións do club Kayak, asistiron o alcalde focense, Javier Jorge Castiñeira, o concelleiro Ánxel Paleo e directivos do club Kayak, ademais de familiares e amigos do deportista, que recibiu unha figura de cerámica como recordo deste acto.
O rexedor municipal explicou que “o Concello de Foz quere felicitar a Xoel García recentemente consagrado como campión de España sub17 e subcampión xuvenil. É un deportista importante a día de hoxe a nivel nacional no piragüismo e desde o Concello de Foz dicímoslle que é un verdadeiro orgullo para todos nós, para os seus veciños, especialmente para os afeccionados ao deporte e para o club de piragüismo Kayak de Foz, xa que posiblemente sexa un dos maiores éxitos deste club, aparte de levar case 50 anos organizando unha das travesías máis antigas de Galicia. Este éxito deportivo de Xoel todos os que estamos cerca do Kayak sabemos que é moi importante”.
Javier Castiñeira engadiu: “que saiba que está arroupado por todos os seus veciños, que nos sentimos moi orgullosos e desexámoslle moita sorte nas próximas competicións, agora a nivel internacional. É un verdadeiro exemplo posto que compatibiliza as moitas horas de adestramentos no centro de alto rendemento de Trasona coa súa actividade académica, cos seus estudos. Está a conseguir os seus sonos e que saiba que estamos todos detrás dos seus éxitos e que lle desexamos moita sorte”.