O BNG de Foz denuncia que o alcalde coñecía as carencias da cuberta do pavillón antes da inauguración en novembro de 2017

Foz, 9 de abril de 2018. O BNG-AA de Foz vén de facer públicas, no último pleno, as conclusións dos informes técnicos agochados polo PP que evidencian a enésima manipulación e falsedade marca do Alcalde do PP. O pasado 11 de novembro do 2017, despois de 6 meses (aínda está o cartel que anuncia as obras que escomezaran en maio de 2017, cando o prego de condicións dicía que serían de catro meses…), inaugurábase unha obra demandada polos cidadáns e as entidades deportivas de Foz, o pavillón de Marzán, a iniciativa do BNG que solicitou que se fixera como arranxo integral e non o depropósito en que a nula xestión do PP rematou a obra.

A reforma, por riba de ser entregada fóra de prazo, foi realizada de xeito incompleto por obra e graza do señor Castiñeira. Si, incompleta porque o que o pavillón de Marzán precisaba, e o que o BNG de Foz solicitara, era unha reforma completa, empezando (por unha vez) polo tellado, fonte de pingueiras. Esta é a causa agora dunha segunda reforma para reparar o despropósito iniciativa do alcalde.

Unha vez iniciada a reforma parcial do pavillón, resultou evidente que o tellado non estaba en boas condicións. Por moito que o Alcalde asegurara que fora recuberto había relativamente pouco e que por tanto non era preciso mudar a cuberta, garantindo así a posible rebaixa do orzamento preciso para a obra (e apuntándose o tanto dun aforro que resultou ser novamente falso), resultaba evidente que non era problema só de condensación. Como todo o mundo xa sabía, chovía na pista por filtración e non por condensación. As paredes e os regueiros que había marcados da auga nas cerchas da cuberta evidenciaban que si entraba auga polo tellado.

Por se non fose suficientemente lamentable que o señor Castiñeira non quixese recoñecer o que era evidente, achegando argumentos certamente esperpénticos, o que resulta impresentable é que cando os proprios operarios evidenciaron como as unións de solape entre as chapas estaban enferruxadas e podres, as arandelas dos parafusos de suxeción das chapas tamén, como non estaba rematada a unión das chapas contra o muro frontal, os canalóns con buratos e filtrando auga polas paredes e un longo etcétera, tampouco se fixera nada. E por riba estando en posesión dun informe de estanqueidade feito pola empresa especializada de ensaios Inveco en agosto de 2017, no que se detalla, despois de 6 horas ininterrumpidas de simulación de chuvia intensa, como si existían filtracións en numerosísimos puntos, entre outros: encontro do primeiro remate de ventilación dende a fachada leste co faldón; solape de chapas en faldón norte; xunta entre chapa traslúcida e chapa metálica en faldón norte; fugas no canalón da fachada sur; filtración a través da fachada, a nivel de soleira, por verquido de baixante directamente ao terreno por riba da impermeabilización de fachada na esquina suroeste; os parafusos de fixación de chapas… e máis aínda.

A consultora elabora despois un informe para tratar de evitar o inevitable: que co parqué novo e despois de gastar en torno a 400000 euros no arranxo incompleto, continúen as pingueiras. O informe desta empresa, con data de outubro de 2017, un mes antes da pomposa inauguración do pavillón, poñía de manifesto a imperiosa necesidade de mudar a cuberta e di nas súas conclusións que “dada a gravedade e extensión dos danos (100 % da superficie), considérase necesaria a actuación integral sobre a cuberta (…). Obsérvanse tamén danos no lucernario da fachada sur, os cales polo momento non provocan a filtración de agua pero a corto-medio prazo hai probabilidade de que así sexa, constituíndo un risco para a tarima de madeira acabada de instalar no interior do pavillón.”

Pois ben, contra toda evidencia técnica e non técnica, o alcalde do PP intencionadamente quixo ignorala para poder inaugurar o que fose, como fose e deixar pasar os sucesivos trens de borrascas que vivimos este inverno e ter a desvergoña de apuntarse como éxito proprio a boa tempada dos Celtas, suxerindo que foi grazas á mellora das instalacións (maldita hemeroteca!), esta pseudorreforma que pon en risco o fin de tempada e o uso do resto de entidades deportivas da instalación.

O que o pavillón de Marzán precisaba era unha obra completa e algo de cabeza e sentidiño, empezando, desta volta si, polo tellado, e quedámonos sen nada, marca do alcalde do PP.