O PP denuncia a “vergonzosa campaña de acoso” á que a Plataforma Sanitaria someteu aos seus concelleiros en Viveiro

Lugo, 5 de abril de 2018.- O Partido Popular de Lugo sae en amparo dos seus concelleiros en Viveiro ante a vergonzosa campaña de acoso á que foron sometidos por integrantes da Plataforma Sanitaria da Mariña con ocasión do último pleno municipal.

Os populares denuncian a progresiva radicalización deste colectivo instrumentalizado polas forzas da oposición e sindicatos afíns e exixen que, con independencia das lexítimas discrepancias que poidan ter, garden o respecto debido aos concelleiros do PP, que son representantes públicos elixidos polos veciños.

Desde o PP aseguran que os integrantes da Plataforma Sanitaria son libres de dedicarse a agarrar pancartas e protagonizar os actos de protesta que queiran, pero o acontecido onte non son formas de defender os seus argumentos e non teñen dereito algún a apupar e incluso zarandear ás persoas que non pensan como eles. De feito, o único que fan con este acoso é quedar en evidencia ao ter que recorrer a este tipo de prácticas tan ofensivas.

Os populares din que calquera veciño poderá observar como esta actitude de acoso está instigada e protagonizada por 20 ou 30 persoas -sempre as mesmas- que os únicos intereses que defenden son os seus propios e que o único que buscan é facer ruído e atención mediatica.

Desde o PP insisten ademais na súa discrepancia absoluta cos argumentos que empregan neste colectivo e aseguran con contundencia que a Plataforma Sanitaria está enganando á poboación xa que a nova Lei, tramitada no Parlamento -e que crea o distrito da Mariña- blinda os servizos sanitarios da comarca, en especial, do Hospital da Costa que está en plena ampliación e que hoxe ten máis persoal e servizos que en 2009, cando gobernaba o bipartito.