O Concello loitará pola construción dun novo pavillón para o que espera a colaboración da Deputación e da Xunta. O Alcalde dixo que con esta infraestrutura faríase fronte ás esixencias da Liga nacional de fútbol sala e ás demandas que ten Burela para a práctica deportiva

Burela, 11 de maio de 2018. O Concello loitará pola construción dun novo pavillón. Así o anunciou o alcalde, Alfredo Llano, despois do encontro mantido hoxe coa arquitecta municipal e co arquitecto encargado de elaborar o proxecto de reforma do Vista Alegre. Os 800.000 euros que habería que investir na reforma non garanten que no futuro a Liga Nacional de Fútbol Sala poida realizar novas esixencias para a participación nesa competición. O rexedor agarda contar coa colaboración da Deputación de Lugo e da Xunta de Galicia.
Alfredo Llano declarou que “hoxe, despois dunha reunión que tiven co arquitecto que confeccionou o proxecto de mellora no pavillón Vista Alegre, e falando tamén coa arquitecta municipal, estivemos analizando todo o que pode suceder no futuro se decidimos arranxar o novo pavillón para adaptalo ás necesidades que esixe a Liga Profesional de Fútbol Sala”.
O alcalde comentou que “analizamos o que pode valer, o que pode custar e, sobre todo, os problemas que se van derivar de facer a obra alí porque habería que sacar de dar clases nese espazo, non se podería xogar ao fútbol sala de Primeira División Feminina, non se poderían facer eventos deportivos, ou sexa que nos ía condicionar durante bastante tempo e ía traer uns prexuízos de organización, e de buscar solucións para todo o que hai aí, moi grandes”.
O rexedor subliñou que “a contía do arranxo é bastante elevada, que pode saír entre 750.000 ou 800.000 euros, ademais no futuro non nos van garantir que isto sirva xa dunha maneira definitiva para que o Burela FS puidera xogar na Primeira División con todas as garantías, non hai unha certificación clara de que iso vaia suceder. No mandato dos anos 2007 ao 2011, fixemos unha ampliación acorde coas esixencias daquel momento do que pedía a Liga Profesional para que puideran xogar en Primeira División. Cando rematamos as obras certificaron que valía para xogar en Primeira División, e estívose xogando nesta categoría durante moito tempo”. E engadiu que “agora por esixencias das televisións fan unha nova normativa que debemos cumprir, pois non temos unha seguridade de que arranxando isto no futuro nos vaia servir, igual temos que volver facer obras”.
Para Alfredo Llano “a mellor solución, e así o decidimos hoxe, vai ser loitar por un novo pavillón para Burela. Non soamente pensando no fútbol sala profesional senón pensando nas demandas, nas necesidades, no que realmente nos fai falta en Burela, que é un novo espazo onde poder practicar deporte, que é moi demandando. Pasámolo sempre moi mal para organizar os horarios de todo o que se fai en Burela, dos colexios, dos equipos, dos particulares, etc… Hai moito dinamismo no deporte en Burela e necesitamos un novo pavillón como garantía de que se poden cubrir todas estas necesidades”.
O alcalde de Burela dixo que “aproveitando esta ocasión, imos xa intentar que sexa o antes posible a realidade dun novo pavillón. Posiblemente fagamos un concurso de ideas. Despois imos calcular cal é a contía dunha instalación que sexa válida tanto para a práctica deportiva como para un evento que poidamos traer a Burela no eido cultural, de exposicións, etc… En canto saibamos o prezo imos tratar de facer convenios, que xa o falei na Deputación e coa Xunta. Entre a Xunta, a Deputación e o Concello de Burela temos que conseguir un novo pavillón aproveitando esta cuestión do fútbol sala, pero sobre todo pensando nas necesidades de Burela, para que isto sexa unha realidade o antes posible”.