Burela, 6 de xullo de 2018. O Concello izou este mediodía as bandeiras azuis nas praias de A Marosa, Ril e O Portelo, e tamén a ISO 14.001. O alcalde, Alfredo Llano, asegurou que estes galardóns son o recoñecemento ao traballo feito. O rexedor anunciou que a bandeira azul do barco museo Reina do Carme será izada o 4 de agosto, coincidindo coa celebración da feira do bonito.
Alfredo Llano comentou que “izamos as bandeiras azuis e tamén as da normativa 14.001. Xa queríamos facelo a semana pasada, pero debido á grande cantidade de choiva que veu non caía moi ben levantar as bandeiras azuis cando estaba chovendo”.
O alcalde salientou que “estes galardóns veñen indicar que no Concello de Burela estamos facendo as cousas moi ben no aspecto de coidar as praias, de preparalas e telas sempre na situación para que se manteñan as nosas bandeiras azuis. Tamén é indicativo de que a xente coida o entorno para que isto sexa unha realidade ano tras ano”.
Llano lembrou que “este ano déronnos tres bandeiras azuis para A Marosa, Ril e O Portelo-Cabaliño. Están contrastadas na calidade de auga e tamén nos van servir para indicar claramente que hai seguridade, limpeza e servizos. Isto tamén está complementado coa 14.001, que é un indicativo claro de que por un lado se pode contar cunha auga transparente e boa para o baño, con todas as cualidades perfectas e a calidade extraordinaria, e por outro lado o tema de seguridade cos socorristas”.
O rexedor dixo que “agora mesmo en Burela estamos con cinco socorristas xa fixos e imos ter dous máis inmediatamente, estamos co proceso. De momento en Ril non hai socorristas, pero vai habelos para próximas semanas. Isto é favorable para que a xente veña con confianza ao noso concello, disfrute dos areais e que vexa Burela como unha alternativa boa para pasar uns días, estar aquí con nós e disfrutar de todo aquilo que nosoutros poidamos ofrecerlles”.
Alfredo Llano engadiu que “ademais das tres bandeiras que corresponden ás praias, tamén temos outras tres que son moi importantes para nós. Unha delas é a de Gaia, que é a aula de medio ambiente onde se está realizando unha boa ensinanza e unhas boas prácticas para manter un bo nivel medioambiental nos nosos arenais. Despois está a ruta verde do litoral que cruza o noso concello, e que tamén é merecedora dunha bandeira azul. E temos algo que para min é moi importante, que é bandeira do barco museo Reina do Carme. Cando fomos recoller as bandeiras azuis este ano dixeron que en toda España soamente se daba a cinco barcos este galardón, un deles é o noso barco porque é o único museo que está flotando. Ten unha importancia e unha singularidade no noso porto extraordinaria. Esa bandeira azul que corresponde ao barco museo imos izala o próximo 4 de agosto, coincidindo coa feira do bonito”.
O alcalde manifestou que “hai que dicir que de toda España ser o único barco museo que hai é moi representativo e é unha influencia clarísima para favorecer o turismo na Mariña, e sobre todo no noso concello. Hai moito visitante a este barco museo e imos tratar de mantelo en bo servizo durante moito tempo”.
No izado das bandeiras azuis estiveron xunto a Alfredo Llano varios edís do Concello burelés.
Este venres foron izadas en Burela as bandeiras azuis nas praias da Marosa, Ril e o Portelo
Relacionado
Unha xornada de convivencia que comezará ás 11:30 h na Alameda, con misa de campaña, sesión vermú, comida, sorteo e festa ata as 19:00 h. A principal novidade é o menú con paella, sobremesa, bebida e café. Para participar é preciso vale: 7 € para persoas empadroadas e 10 € para non empadroadas e acompañantes, dispoñible nas oficinas municipais, onde tamén se pode solicitar transporte. Senllos concellos animan á veciñanza maior a sumarse a esta cita de encontro e recoñecemento.
O público poderá desfrutar dunha proposta que parte da música tradicional galega, combinando a gaita e as frautas con instrumentos como o violín, acordeón, guitarra, baixo ou percusión, nunha mestura de tradición e modernidade cun marcado carácter atlántico e celta. A actuación, con entrada libre, ofrece unha noite para gozar da música galega en directo e seguir achegando a cultura e a tradición aos espazos públicos do municipio.
A actuación estará a cargo da Coral Polifónica de Ribadeo coa colaboración do Coro Sagrado Corazón. A entrada solidaria ten un prezo de 6 euros e poderá adquirirse na billeteira do teatro o mesmo día, en horario de 12:00 a 13:30 e desde as 19:00 horas. O evento conta coa colaboración da AECC Lugo, o Concello de Ribadeo e o espazo cultural Castillo San Damian.
Foi a unhas oito millas de Estaca de Bares. O 112 Galicia tivo coñecemento do suceso arredor das 22:30 horas deste luns a través do Servizo de Gardacostas de Galicia, que indicou que se mobilizaba o helicóptero Pesca II logo de que se producise lume nun barco, con tres tripulantes a bordo. Porén, os mariñeiros foron evacuados do lugar a través dun pesqueiro que se atopaba na zona para, posteriormente, ser trasladados en ambulancia. Por outra banda, o barco finalmente afondou no mar. Cómpre mencionar que neste operativo tamén participaron Salvamento Marítimo e a Garda Civil.
Esta actividade, organizada polo Concello de Lourenzá, será na praza César Chavarría Pacio e haberá tres funcións: ás 13:00, ás 18:30 e ás 20:00 horas. A entrada é de balde por orde de chegada ata completar aforo. A alcaldesa de Lourenzá, Rocío López, destaca que “a maxia é unha desas propostas que sempre ten unha acollida moi especial en Lourenzá. Gusta aos pequenos, pero tamén consegue sorprender e ilusionar aos maiores, converténdose nun plan perfecto para gozar en familia”.
Xunto a autoridades locais, destacou a importancia de preservar as tradicións e lembrou que a Deputación destinou este ano 400.000 € ao Concello para servizos básicos. A festa, creada en 1992 e impulsada pola Asociación de Amigos da Malla, busca recuperar e poñer en valor este oficio tradicional. A programación incluíu documental, obradoiros, música, exposicións de maquinaria antiga e actividades para nenos.
Ata a Cedofestiña, que tivo lugar onte no Pazo de Cedofeita, se achegaron o alcalde, Dani Vega, e a concelleira de Cultura, Begoña Sanjurjo. O Concello colaborou unha edición máis coas Vacas Fracas.
