O PSOE e o PP entorpecen a iniciativa do BNG para construír un novo pavillón en Burela. Os nacionalistas cren que as leas bipartidistas non serven para avanzar neste asunto

Burela, 13 de Agosto de 2018. Despois de que nas últimas datas se pronunciaran nos medios representantes tanto do PP como do PSOE, dende o BNG non entenden como existindo acordos unánimes tanto no concello de Burela coma na deputación de Lugo, a expensas da redacción dun proxecto para a construcción dun pavillón polideportivo en Burela, esas dúas formacións políticas pelexen sen avanzar nada ó respecto.
Para o voceiro do BNG en Burela, Mario Pillado, “estamos nas mesmas de sempre, eles mirando polos seus intereses e a veciñanza e o tecido asociativo deportivo de Burela agardando unha solución”. Lembra que “para nós era fundamental ter un acordo unánime da corporación municipal, o que non foi fácil de conseguir no pleno, pero semella que agora algúns non se lembran dese acordo”.
Llano sen proxecto e o PP utilizando as institucións para interese propio.
Do que se publicou nos últimos días nos medios, Pillado destaca que “O señor Alcalde de Burela, Alfredo Llano, comprometeuse a obter a redacción dun proxecto co que negociar financiamento coas institucións antes de Outubro, pero polo que vemos non o debe ter porque a propia deputación, gobernada polos socialistas, emprazou a firma dun convenio para o finamciamento ó momento de que existise o proxecto; e agora según o propio Llano conta, anda paseando pola Xunta cunha memoria, que non é de ningunha maneira o que se comprometeu a facer no pasado pleno do 6 de Xuño”. Ademáis o nacionalista engade que “semella que non dispón nin dos terreos, algo ó que tamén se comprometeu nese mesmo pleno, fala dun suposto terreo de 10.000 metros cadrados pero non di nada da súa compra”.
Por outra banda, o portavoz do BNG destaca que “dende o PP, que adoptou dende o principio unha actitude totalmente á defensiva, volven a empregar as institucións no seu propio interese partidista por riba dos intereses da veciñanza. Semella que o PP en Burela está para solucionarlle a papeleta á Xunta en lugar de defendelos intereses da nosa vila, sabendo como é evidente que é a Xunta quen mais se ten que mollar neste asunto”.
Por último, “vemos con preocupación como PSOE e PP empregan esta iniciativa do BNG no concello e na deputación para unha mais das súas disputas, en beneficio dos seus intereses partidistas e electorais, sen pensar na veciñanza nin no tecido asociativo da vila” dixo Pillado que rematou afirmando que “alí onde haxa un representante do BNG defenderá a construción do pavillón para Burela e defenderá os intereses da veciñanza, como sempre facemos”