Cervo, 11 de outubro de 2018.- A Consellería de Educación, Universidade e Formación Profesional investiu máis de 581.000 euros, desde o ano 2009, en distintas obras de mellora dos centros educativos de Cervo.
As achegas autonómicas, promovidas en colaboración co Concello de Cervo e en coordinación cos equipos directivos dos centros, permitiron desenvolver múltiples actuacións na totalidade das instalacións, isto é, nos dous colexios e no instituto do municipio.
CEIP Península da Paz
Así o explicou esta mañá, a modo de balance, o delegado territorial da Xunta en Lugo, José Manuel Balseiro, durante unha visita ao colexio Península da Paz, en San Cibrao, na que estivo acompañado do alcalde, Alfonso Villares e doutras autoridades.
Precisamente, a achega máis relevante neste mesmo centro tivo lugar no ano 2012 coa ampliación do pavillón polideportivo cuberto.
Con todo, a visita actual tiña por obxecto comprobar outra actuación de mellora recentemente finalizada, nesta ocasión, no patio de xogos ao aire libre, que foi mellorado e repintado grazas a un investimento autonómico de 17.500 euros.
A estes traballos veñen sumarse á recente reforma do parque infantil que se acometeu con fondos municipais e que supuxo dun investimento de algo máis de 20.000 euros.
CEIP de Cervo e IES Marqués de Sargadelos
“Todos os centros educativos do municipio contaron co apoio da Xunta e do Concello, en concreto neste verán, con obras de pequena envergadura pero de grande utilidade e servizo para a comunidade escolar e, en especial, para os nenos e nenas que a diario acoden ás aulas”-explicou Balseiro.
Así a Xunta financiou con 9.000 euros a mellora da biblioteca do outro colexio da localidade, o que está emprazado na capital municipal (CEIP de Cervo) e rematou o peche perimetral do IES Marqués de Sargadelos, actuación que supuxo un investimento global de 15.800 euros.