Burela realizará unha diagnose do seu servizo de abastecemento de auga ao longo dos vindeiros dous meses. Así se acordou na xuntanza celebrada en Santiago cos concellos que forman parte do proxecto europeo Aquamundam

Burela, 11 de outubro de 2018. O alcalde, Alfredo Llano, participou onte en Santiago nunha xuntanza do proxecto europeo Aquamundam, que ten por obxectivo mellorar o ciclo integral da auga. O acordado foi realizar unha diagnose dos concellos participantes durante dous meses para analizar os caudais, a distribución, o abastecemento, etc… O rexedor burelés aproveitou a ocasión para falar coa responsable de Augas de Galicia sobre a nova Edar.
Alfredo Llano explicou que “onte asistín a unha reunión que estaba convocada, a través de Augas de Galicia, para realizar unha primeira toma de contacto entre os concellos que imos participar nun programa europeo, que é Aquamundam. Este proxecto está liderado polo Instituto Tecnolóxico de Galicia, e tivemos unha reunión con este instituto máis con Augas de Galicia e os catro concellos implicados que somos Ames, Soutomaior, Noia e Burela, polas características que temos cada un de nós con respecto ao que debe ser unha boa xestión da auga”.
O alcalde burelés dixo que “se trata de facer un estudo e unha planificación para a xestión integral da auga, sobre todo no que é o abastecemento, o saneamento e a depuración. Onte fixemos o primeiro contacto e agora imos traballar sobre un diagnóstico que se vai facer a todos os concellos, e imos aportar uns datos relativos á importancia que pode ter o tema do ciclo integral da auga. O único que se vai facer durante dous meses é recoller datos como son os caudais, a distribución, os problemas que poden ter, os diferentes abastecementos, as características, o número de abonados, e unha serie de detalles que van facer falta para despois facer un estudo máis en profundidade e telos en conta para mellorar o que importa para unha boa calidade da auga en todos os aspectos”.
O rexedor engadiu que “dentro de tres meses quedamos en volver reunirnos, unha vez que se faga o informe, e veremos que é o que hai que facer en cada un dos concellos e xa veremos o que hai que facer tamén en Burela”.
Alfredo Llano declarou que “tamén tiven ocasión de falar coa nova presidenta de Augas de Galicia do proxecto da nova Edar. Queremos que se apure ese proxecto, estiven explicándolle que é unha necesidade urxente agora mesmo construír esta nova Edar en Burela, e soliciteille que se vaian dando os pasos relativos a facer isto o antes posible. Agora mesmo está o proceso do proxecto en plan de información medioambiental, e iso levará un mes máis ou menos, e hai que continuar o antes posible”.