Na Biblioteca Municipal de Burela estará dende a vindeira semana o Diccionario de artes de pesca de España y sus posesiones, de Benigno Rodríguez Santamaría. O Alcalde, Alfredo Llano, salienta a importancia deste documento para os estudosos da pesca nesta comarca

Burela, 11 de outubro de 2018. Na Biblioteca Municipal de Burela estará desde a vindeira semana o libro Diccionario de artes de pesca de España y sus posesiones, de Benigno Rodríguez Santamaría. A directora xeral de Pesca, Mercedes Rodríguez, fíxolle esta doazón ao Concello coincidindo coa celebración do 50 aniversario do barco Reina del Carmen. Para o alcalde de Burela, Alfredo Llano, trátase dun documento moi valioso que estará a disposición dos estudosos e persoas interesadas pola pesca de principios do século pasado tanto no litoral lugués como asturiano.
O rexedor referiuse “a esta doazón que nos fai a Consellería do Mar do Diccionario de artes de pesca de España y sus posesiones, titúlase así e do que o autor é Benigno Rodríguez Santamaría. Foi editado no ano 1923 e é un tomo que se nos doou a través da directora xeral, Mercedes Rodríguez. Tivemos ocasión de ver que é moi conveniente levalo para a Biblioteca porque vai servir para aqueles estudosos que queiran consultar e apreciar todo o que ten que ver coa pesca desa época”.
Alfredo Llano subliñou que “como documento histórico é extraordinario. Foi un estudo que se fixo en todos os portos de España, pero aquí na Mariña o investigador estivo en todos e cada un dos portos que constitúen a comarca e tamén estivo en Asturias. Este traballo é moi importante para ser estudado e consultado para aqueles temas que teñan relación coa pesca”.
O alcalde engadii que “se fala da pesca da balea, da pesca de todo tipo, de como eran os barcos, como eran as redes, como eran as artes, onde se faenaba e a cantidade de capturas que había, fálase das tripulacións. É un documento extraordinario para aquela xente que estea interesada en consultar, en facer traballos e estudos sobre a pesca tanto na nosa comarca como no resto do país. A partir da semana que ven imos colocalo na Biblioteca Municipal de Burela para que poida ser consultado”.