O Concello ofreceu unha recepción ao ximnasta ribadense Yuri Rascado tras proclamarse subcampión de España na modalidade de cabalo con aros

Ribadeo, 23 de outubro de 2018. O Concello ofreceu unha recepción ao ximnasta ribadense Yuri Rascado Pita que se proclamou subcampión de España na modalidade de cabalo con arcos. Ao acto asistiron o alcalde, Fernando Suárez, o concelleiro de Deportes, David Rivas, e o técnico de Deportes, Iván López.
O edil de Deportes dixo: “eu sempre entendín o deporte como sinónimo de sacrificio, de dedicación e sobre todo de loita contra un mesmo, que realmente me parece moito máis complicada que a loita contra os rivais porque require, ademais dunha excelente preparación física, unha solidez e un traballo psicolóxico de moi alto nivel. Penso que poucos deportes requiren o grado de disciplina, de traballo e de concentración que son necesarios na ximnasia artística onde practicamente podes xogarte toda a tempada nun minuto de exercicio, a concentración ten que se máxima, calquera mínimo error pasas de subir ao podio ou quedar fora del por un despiste”.
David Rivas dirixiuse ao ximnasta Yuri Rascado dicíndolle que “estamos seguros de que tiveches que dar o cen por cen de ti mesmo para conseguir esa merecidísima medalla de prata no cabalo con arcos. Para nosoutros é un orgullo que un ribadense se suba a un podio aínda que neste caso fose defendendo os cores da Universidade da Coruña, porque en Ribadeo loxicamente de momento non temos ningún club que practique esta disciplina deportiva. Quen sabe se nin futuro, cando gañes todos os títulos posibles, che apeteza virte para Ribadeo, montar un club e poñerte a adestrar”.
O concelleiro ribadense engadiu que “queríamos facerche este pequeno acto de homenaxe, de recoñecemento, de valorar ese montón de horas de adestramento que te levaron ao podio. Ao mesmo tempo animarte e apoiarte para que sigas, sobre todo, disfrutando do deporte e traballando con ilusión porque esa é a parte fundamental, e cando se traballa con gañas e con ilusión os resultados ves que chegan. Darche a noraboa e dicirche que esperamos volver verte por aquí en ocasións futuras, porque sería un moi bo sinal tanto para ti, porque agrandarías o teu palmarés, como para todo Ribadeo que a día de hoxe xa pode presumir de que ten outro campión”.
Pola súa banda o alcalde, Fernando Suárez, manifestou que “o que destacamos é terte hoxe aquí porque nosoutros cada ano facemos unha gala do deporte, pero todas aquelas personalidades que coma ti teñen destacado a nivel estatal, etc…, lles facemos un recoñecemento singular como é o caso, sen prexuízo de que cando é a gala do deporte tamén te chamemos aquel día”.
O rexedor ribadense declarou: “parécenos que nesta sociedade onde vivimos hai algúns deportes que están en todos os telediarios, e logo hai outros que non se sabe nin que existen, empezando por min. Cando vin que había un rapaz que quedou subcampión de España de potro con arco, non sabía case nin que era, e coma min moita xente porque son deportes minoritarios que practican moi poucos en comparación con estes masivos que están ata na sopa, entón o teu ten moito mérito, o de todos ten mérito pero o teu especialmente”. E engadiu: “ademais aquí ata non temos nin demasiadas instalacións para que, aínda adaptándoas, puideras adestrar. Polo tanto é un mérito que leves o nome de Ribadeo, o nome de Galicia por aí adiante, e sen dúbida xente coma ti fai que outros tantos nenos dentro de pouco teñan a quen admirar, teñan un referente que vas seguir sendo ti, e que se vaian animando máis para que este deporte con tan poucos seguidores, igual dentro de pouco sexa un pouco máis masivo”.
Suárez Barcia deulle un consello a Yuri Rascado: “un consello que sempre dou, sei que poñedes todo o máximo de vosoutros mesmos para isto, pero non descoidedes os estudios porque iso é o equilibrio que debemos ter. Polo tanto toca seguir estudando e conseguindo títulos, se os conquistas fenomenal, senón non pasa nada, segues practicando este deporte tan bonito”.
Yuri Rascado Pita estivo acompañado neste acto polos seus pais e pola súa irmá.