Compromiso por Galicia: “En Marea representa unha trampa para Galicia, un novo engano”

Compostela 7-3-19. Compromiso por Galicia sinala que é lamentable a posición de “En Marea” querendo xogar a representar os intereses dos galegos e galegas, cando na súa estratexia unicamente cabe a unión con forzas políticas ás que non lles interesa nada Galicia. “En Marea” representa unha trampa para Galicia, xa que supeditarán os seus intereses partidistas por manter os asentos en concellos como o de A Coruña, Santiago ou Ferrol, onde iran en listas conxuntas con Podemos e Esquerda Unida, pacto que trasladarán posteriormente tamén ás deputacións provinciais. Isto non sería nada novo, esta trampa xa a fixeran cando prometeran grupo propio galego e pasaron a ser unha axencia pequena de Podemos no Congreso dos deputados. Non é nada que xa non teña pasado con anterioridade.

“A INDIGNIDADE DA “EN MAREA” FAI PRECISO QUE EXPLIQUE COMO VAI PRESENTARSE NAS MUNICIPAIS, XA ESTÁ BEN DE XOGAR COA ILUSIÓN DA XENTE.”

“O camiño segue a ser unha Roga Galega, unha xuntanza estratéxica de partidos co centro de decisión no País, os galeguistas seguiremos explorando esta vía, aínda ca rotunda negativa do BNG e de “En Marea” sinalou o Secretario Xeral.

Dende Compromiso por Galicia lamentan profundamente o papel xogado por estas dúas formacións políticas a semana pasada, desatendendo as súas obrigas para co País e negando o diálogo, que é a base da política. Aínda así, dende Compromiso por Galicia asumen que non é unha batalla perdida e seguiran na procura de vías para xuntar o máximo de forzas políticas que teñan interese en defender a Galicia nunhas novas Cortes Xerais que poden marcar unha involución recentralizadora no estado.

Juan Carlos Piñeiro: “Seguiremos na vía do diálogo, na vía da política que entende a xente, na política de acadar que Galicia teña un peso político propio no estado.”

O secretario xeral galeguista, Juan Carlos Piñeiro, subliña a necesidade de que Galicia conte con forza política propia dentro do estado, na nova lexislatura saída das eleccións xerais do #28A. Vivimos momentos en que é precisa unha defensa forte dos intereses da cidadanía galega en Madrid. O importante é a presencia dunha forza política galega que defenda os intereses no social, no económico e tamén no referente ao autogoberno e a nosa cultura de País. O momento que está por vir pode ser unha época onde vivamos un forte golpe para o benestar dos galegos e galegas e unha tremenda patada aos nosos valores como pobo, un retroceso de corenta anos e unha disolución política da nosa identidade como galegos e galegas.