Burela 23-3-19. O pavillón Vista Alegre acolleu esta tarde a presentación e acto de apadriñamento de dous equipos do Club Baloncesto Burela, o AFAN Burela Benxamín Feminino e o Burela Benxamín Masculino Camiña Eu Son, coincidindo con compromisos ligueiros da categoría.
Xunto ao presidente Rogelio Cayón e os directivos Carlos Méndez, José García González e Juan Luis Moreno, tamén estiveron presentes Cesarina Fanego e Rubén Blanco, representando a empresa patrocinadora Pescados Rubén SL, ademais de Marcelino Luna, presidente da Fundación Imdecum, e o seu homólogo do Pescados Rubén Burela FS, Manuel Blanco, como entidades colaboradoras.
AFAN Burela Benxamín Feminino e Burela Benxamín Masculino Camiña Eu Son presentaron a imaxe das asociacións que os apadriñan na indumentaria de adestramento, arroupados por José García, secretario de AFAN; Silvino Oroza, presidente de Camiña; Noelia Eijo, directora de Eu Son.
O club burelao estreou este fermosísimo proxecto a tempada pasada unindo o deporte de base a cinco asociacións da bisbarra que son un exemplo en loita, coraxe e afán de superación. Ademais da Asociación de Familiares de Enfermos de Alzheimer e outras Enfermidades Neurodexenerativas en Burela, a Asociación Camiña e a Fundación Eu Son, tamén están integradas a Asociación Esperanza contra o Cancro de Burela, DEBRA-Piel de Mariposa e Axuda ao Enfermo Mental da Mariña, cuxos equipos, nas categorías alevín e prebenxamín, se presentarán no seu vindeiro compromiso ligueiro na casa.