Política Social outorga permiso de actividade á residencia de Ribadeo e, polo que respeta a Xunta, podería abrir mañá mesmo

Lugo, 18 de marzo de 2019.- O delegado territorial da Xunta en Lugo, José Manuel Balseiro, explicou que a Consellería de Política Social vén de comunicar no día de hoxe a concesión do permiso de inicio de actividade (PIA) para a residencia de Ribadeo.

“Trátase da autorización definitiva da Xunta polo que, por parte da administración autonómica, xa non hai ningún trámite pendente e, polo que respecta a Xunta a residencia de Ribadeo podería abrir mañá mesmo”, explicou Balseiro e salientou que “o alcalde de Ribadeo xa non pode utilizar á Xunta como escusa para explicar que a residencia siga coas súas portas pechadas”.

O permiso de inicio de actividade autoriza a apertura dun novo centro residencial, na tipoloxía de miniresidencia que disporá de 48 prazas.

Par finalizar, o delegado territorial lembrou que a Xunta tramitou esta solicitude en tres meses: o concello rexistrou a súa petición a finais do mes de decembro e a Xunta logo de facer a correspondente reclamación de documentación, peticións aclaratorias e a visita dos servizos de inspección deu por rematado hoxe a tramitación que lle corresponde achegando o permiso de inicio de actividade.

“O alcalde de Ribadeo tiña moita presa porque a Xunta dera este paso e agora que o ten feito agardamos que teña a mesma presa para cumprir con todos os trámites pendentes que son responsabilidade exclusiva do propio Concello e da Deputación de Lugo”