O BNG de Mondoñedo pídelle prudencia ao equipo de goberno ante a iniciativa de repartir de forma indiscriminada 4000 mascarillas entre toda a veciñanza do Concello

 Mondoñedo, 11 de abril do 2020. Logo do comunicado desta semana do goberno municipal no que se anunciaba a adquisición de 4000 mascarillas de protección co gallo entregar unha a cada veciño e unha vez que xa se comezou a repartir o material de protección, o BNG de Mondoñedo pídelle prudencia á equipa de goberno xa que non consideran lóxico que se estean distribuíndo mascarillas de un só uso por persoa de forma indiscriminada e sen criterios obxectivos de necesidade nun contexto de estado de alarma que obriga a un confinamento de toda poboación nas súas casas e mentres o sistema socio-sanitario galego que presta un servizo esencial e prioritario non conta con suficientes equipos de protección para o desenvolvemento do seu traballo durante a súa xornada laboral.
Eloi Cabanas, Voceiro do BNG no concello pide unha reflexión e suxire que as mascarillas se poñan a disposición das persoas que verdadeiramente teñen a necesidade de usalas e non das que non teñen a obrigatoriedade de levalas.
Segundo o BNG, a mellor protección é quedar na casa para evitar riscos innecesarios, “non sabemos o que vai durar esta situación e de facerse efectiva no seu momento de forma oficial a recomendación ou a obriga de saír á rúa con máscara, as autoridades sanitarias deberían garantir o subministro suficiente das mesmas e a un prezo razoable”.
O BNG lembra que fai tes días o Vicepresidente da Xunta, Alfonso Rueda, pedíalle ao Ministerio de Interior un protocolo único no caso de que se amplíe a máis poboación a recomendación do uso das máscaras porque, “ante circunstancias como a actual pandemia de coronavirus, é precisa unha postura coordinada do uso deste material a nivel estatal” así que non ten moito sentido que o concello reparta agora este material que só vale para unha única saída á rúa cando a Xunta de Galicia está recoñecendo que non sabe como actuar.