O Concello de Viveiro aconsella aos veciños e vecinas que camiñen pola beirarrúa da súa dereita na Ponte da Misericordia

 Viveiro, 2 de maio de 2020. O Concello de Viveiro instalou uns carteis na Ponte da Misericordia recomendando aos veciños e veciñas que camiñen pola beirarrúa da súa dereita, co fin de establecer unha orde de circulación peonil que permita utilizar cada unha das beirarrúas nun único sentido e, deste xeito, garantir o cumprimento da distancia social de seguridade.

Dende o concello adoptouse esta medida tendo en conta a estreitez destas beirarrúas e que a Ponte da Misericordia é unha das zonas máis concorridas. No momento de establecer esta medida, o goberno municipal tamén estivo valorando outras zonas, como é o caso da ponte de Feve, que tamén é moi estreita, ou a ponte da Variante.

Finalmente, nestes puntos non se colocaron vallas establecendo unha orde de circulación peonil tendo en conta que non había unha alternativa segura. Para aplicalo na ponte de Feve habería que cruzar no paso de cebra do paseo marítimo e, ao tratarse dunha distancia longa, había o risco de que a xente cruzase de forma indebida pola estrada, nunha rotonda bastante complicada; no caso da Variante, que tamén é estreita, tampouco había alternativa.

En todo caso, en Viveiro hai paseos e zonas amplas polas que poder pasear seguindo as indicacións das autoridades sanitarias para manter a distancia social de seguridade; dende o concello solicítase a todos os veciños e veciñas que se teñan en conta estas recomendacións e agradécese a súa colaboración.