O PP de Foz alerta da perigosidade da Ponte de Forxán

 Foz, a 7 de setembro de 2020. O Grupo Municipal do Partido Popular de Foz, e alertados polos veciños, advirte da perigosidade da ponte de Forxán. Nas obras realizadas polo Goberno central na N-642 quedaron elevadas tres destas infraestruturas, o que constitúe un alto risco para os usuarios. “É razoable que haxa que elevar por razóns técnicas pero o que é inaceptable e que queden en mal estado e non en perfectas condicións porque, ademais, dan acceso a parroquias importante, o Concello nin se molestou en asegurar que quedase ben”, afirma o voceiro popular, Javier Castiñeira.
“Logo dun ano de molestias, con accesos cortados e limitados con conos, e 600.000 euros de inversión, o estado no que se atopan é inaceptable. O exemplo claro é a ponte de Forxán. Esta xa non estaba ben. Xa quedara mal cando se fixo a variante, habendo moitas reclamacións naquel momento por parte dos veciños da localidade. Era dificilmente empeorable, pero quedou moito peor”, expón Castiñeira.
Concretamente, eleváronse practicamente 20 centímetros, polo que queda unha pendente altísima e moito máis longa, con moi pouca visibilidade. “Todos os que sabemos o historial dese acceso, sabemos que é perigoso, incluso rexistrou algún accidente mortal”. Por este motivo, pídelle ao goberno local que, “xa que non se fixo ben o traballo e o Concello non foi capaz de controlar que quedase correctamente, que se rectifique”. “Entendemos que podería haber outras solucións moito mellores. Nalgún caso onde non era posible subir a estrada o que había que facer era rebaixar o pavimento existente”, apunta o popular.
“Forxán quedou moi mal. Francamente pensamos que non se podería empeorar o estado no que estaba. Por iso, amosamos o noso descontento e pedimos que traten de solucionalo porque pode haber accidentes graves”, conclúe Castiñeira.
Gabinete de Comunicación