A Mariña, 27 de outubro de 2020. A Mancomunidade de Concellos da Mariña Lucense, baixo o convenio asinado coa Axencia de Turismo de Galicia, organizou as II Xornadas de Portas Abertas das Rutas de Artesanía, que se desenvolveron durante as fins de semana do 9 ao 18 de outubro. O ano pasado, estas xornadas estiveran destinadas ao público en xeral, nesta ocasión o ente supra municipal xunto aos artesáns decidiron dedicalas especialmente aos profesionais do turismo, hostalaría e comercio locais, axencias de viaxes e centros educativos co obxectivo de que puideran coñecer de primeira man esta experiencia e recomendala. En total 65 persoas participaron nesta iniciativa da Mancomunidade.
As II Xornadas de Portas Abertas discorreron por parte dos 6 itinerarios turísticos propostos que conforman as Rutas de Artesanía da Mariña Lucense. Comezaron o venres, 9 de outubro, en Burela coas Redeiras Cabo Burela, colectivo que mantén vivo este tradicional oficio, e a visita ao Barco Museo Boniteiro Reina del Carmen, antigo barco boniteiro que o Concello recuperou para convertelo nun espazo de recuperación da cultura mariñeira e de atracción turística no porto máis importante de España na pesca e comercialización do bonito.
O sábado, día 10, foi quenda de Foz, co artesá e artista plástico Daniel Caxigueiro, a visita á Basílica de San Martiño de Mondoñedo e o seu centro de interpretación e un paseo guiado polo porto pesqueiro de Foz. O domingo 11 a iniciativa chegou a Cervo, coa visita ao asteleiro de carpintería de ribeira de Francisco Fra, con mais de 200 anos de historia, e un paseo histórico guiado pola Península da Paz. O venres 16 seguiron estas xornadas en Mondoñedo coa visita ao barrio artesán por excelencia, o dos Muíños, con visita ao Alfar, ao canteiro Vilariño e un paseo guiado polo centro histórico da cidade. O sábado 17 Mondoñedo pasou o testigo a Riotorto, coa visita á forxa de Jomaca, unha pequena ruta de sendeirismo pola Ruta do Ferro e a visita ao Conxunto Etnográfico Mazo de Ferreiravella. As xornadas remataron o 18 de outubro, domingo, en Viveiro coa visita a Otero Regal, unha ruta fluvial polo Paseo Alcalde Cerdeiras e unha visita guiada ao casco histórico de Viveiro.
A axente de Desenvolvemento Turístico da Mancomunidade, Tania Hermida, explicou que “nas xornadas, con aforo limitado, participaron un total de 65 persoas de distintas procedencias, aínda que principalmente da propia comarca da Mariña Lucense e da provincia de Lugo, tamén da Coruña e Asturias. Os perfís dos asistentes foi variado: técnicos de turismo e cultura, guías, propietarios e traballadores de aloxamentos, comercios, do sector da educación ou da publicidade, entre outros. As persoas enquisadas valoraron moi positivamente a iniciativa, outorgándolle unha nota media de 9,75. O 100% recomendaría a experiencia coa que, da man dos propios artesáns, puideron coñecer en detalle e dunha forma interactiva e amena a historia que hai detrás de cada un deles, o seu proceso de traballo e o taller así como algúns dos principais recursos turísticos dos municipios onde transcorreron as xornadas da man de visitas guiadas”.
O presidente da Mancomunidade de Concellos da Mariña Lucense, Fran Cajoto, anunciou que “dende a Mancomunidade estanse a ultimar os detalles para a impresión da Guía das Rutas de Artesanía 2020, con información actualizada sobre os recursos e artesáns do territorio, unha guía coa que, como na edición do 2019, proponse ao visitante afondar no oficio do artesán e desfrutar dos valores naturais, culturais e gastronómicos da localidade onde se ubican. A día de hoxe é posible consultar a guía en formato dixital en amarinalucense.gal”.
A Mariña en Ruta seguirá en novembro
Por outro lado, esta fin de semana, remataron as rutas programadas para o mes de outubro do programa A Mariña en Ruta que a Mancomunidade puxo en marcha tamén co apoio da Axencia de Turismo de Galicia e da Deputación de Lugo e que coordina a empresa de ecoturismo Maremasma. O que a marea esconde, interpretación dun ecosistema intermareal e A berrea, camiñando en terra de cervos foron as dúas rutas organizadas neste mes, que contaron cunha moi boa acollida, 33 e 54 persoas pre-inscritas respectivamente. Tania Hermida dixo que “para cumprir coas medidas de prevención anunciadas recentemente polo goberno autonómico, ámbalas dúas rutas tiveron que ver reducido o seu aforo inicial de 15 persoas a 9 e 4 mais o respectivo guía. Puideron desfrutar desta experiencia persoas procedentes de Madrid, Coruña, Lugo e da mesma comarca da Mariña Lucense. Nos próximos días anunciaranse as novas rutas organizadas para o mes de novembro”.
Fran Cajoto fixo un balance positivo de ambas iniciativas que “o que pretenden é dar a coñecer moitos recunchos da comarca. Algúns deles son auténticos descoñecidos para quen nos visita, pero tamén para moitos e moitas mariñáns. A Mariña Lucense ten moito que ofrecer tamén durante o outono: natureza, tranquilidade, patrimonio, historia, tradición, gastronomía… e neste momento con total seguridade, reducindo o número de asistentes e extremando as precaucións en todas e cantas actividades organicemos”.
Mais infomación:
@A Mariña lucense turismo
@visitamarinalucense
@amarina_turismo
A Mancomunidade de Concellos da Mariña fai un balance positivo da acollida que tiveron as II Xornadas de Portas Abertas das Rutas de Artesanía
Relacionado
A medida tamén fai que as familias perdan a gratuidad do comedor escolar, asumindo un gasto novo. O Concello reclama recuperar a parada mentres non exista unha alternativa segura e manter tanto o transporte como o comedor gratuíto, pedindo unha solución urxente que non prexudique ás familias de Mántaras.
A cita previa pode solicitarse a través do teléfono 981.928.080 ou da web 
Un total de 32 participantes déronse encontro nesta segunda edición, demostrando o seu nivel e desfrutando dunha mañá de competición e compañeirismo. Os gañadores das diferentes categorías foron: Antón Pernas (Sub 8), David Bustabad (Sub 10), Xulio Pernas (Sub 12), Deivid Pérez (Sub 14), Manuel Castro (Sub 16) e Breixo Alvite (Sub 18). A alcaldesa de Cervo, Dolores García Caramés, entregou os trofeos e medallas aos vencedores. O Concello felicita a todas as persoas participantes polo seu esforzo e por contribuír ao crecemento do xadrez no municipio, reafirmando a súa aposta polo deporte, pola participación e por ofrecer novas oportunidades para gozar e aprender.
A proba , organizada polo Club Ciclista Viveiro, reuniu máis de 130 ciclistas e coroou as campioas galegas de todas as categorías femininas -desde infantil ata master-, e aos campions galegos de infantil e cadete. A Praza da Galeguidade acolleu a saída e meta da competición, que se desenvolveu nun circuíto estático de 18,9 quilómetros pasando polo Porto da Gañidoira, a 699 metros de altura.
Trátase de dous MG ZS Hybrid+ Comfort, equipados coa tecnoloxía híbrida autorrecargable Hybrid+, que permite combinar eficiencia e un menor consumo no uso habitual. Segundo os datos do fabricante para este modelo, presenta unhas emisións de entre 113 e 115 g/km de CO₂ e un consumo de combustible de entre 5 e 5,1 litros aos 100 quilómetros, segundo o ciclo WLTP. A adquisición supuxo un investimento de 51.848,50 euros, IVE incluído, financiado a través do Fondo de Compensación Ambiental correspondente ao ano 2026.
Contou con arredor de 90 expositores provintes de todos os puntos tanto de Galicia coma do resto de España e de varias partes do mundo, que exhibiron as súas pezas de tornería en madeira. Tamén acolleu a XVIII edición da Exposición CONtornos. Entre os participantes, destacou a presencia dun expositor provinte da cidade arxentina de Córdoba, así coma outros de Reino Unido, Francia e Portugal. Ata o domingo achegaronse a esta mostra internacional uns 5.000 visitantes, principalmente provintes de toda Galicia e tamén de Portugal.
A competición celebrarase entre o 24 e o 27 de setembro en Las Vegas, e Julia Cabarcos emprenderá esta mesma tarde a viaxe cara aos Estados Unidos para afrontar a súa participación na categoría Women's Physique.
