O PP di que Tomé foi moi irresponsable cando eliminou o teletraballo na Deputación e agora ten que rectificar porque hai varios positivos entre o persoal, incluídos membros do goberno

 Lugo, 17 de xaneiro de 2021. O goberno provincial ten sobradamente demostrada a súa capacidade para incorrer repetidamente no mesmo erro, ou en erros semellantes, de maneira que o equipo presidido polo socialista José Tomé ten que rectificar unha e outra vez. Agora volver a ocorrer, e, como sinala o portavoz popular, Javier Castiñeira, “os feitos dan a razón o grupo provincial do PP e Tomé, unha vez máis, ten que rectificar; nesta ocasión é para restablecer o teletraballo nesta institución, debido a que hai varios casos de positivos en covid-19 entre o persoal da Deputación”.

Castiñeira sinala: “O grupo provincial do PP xa denunciou en novembro pasado que, mediante unha circular interna, o goberno provincial eliminaba a posibilidade de teletraballar; chamounos especialmente a atención que se impedira a posibilidade de teletraballar o 50% da súa xornada a aquelas persoas con fillos en idade escolar ou con dependentes ao seu cargo. Non entendemos aquela decisión; criamos e cremos que o teletraballo era e é positivo, non só para conciliar a vida laboral e familiar, senón para evitar contaxios, e especialmente sabendo as previsións que había xa naquel momento”.

Os populares consideran que “Tomé foi moi irresponsable cando eliminou esta posibilidade e agora non lle queda outra que rectificar, despois de varios casos positivos nestes últimos días entre o persoal da Deputación, incluídos varios deputados do equipo de goberno”.

Así as cousas, Castiñeira pide “explicacións ao señor Tomé” e indica que o presidente da Deputación “debe pedir desculpas, sobre todo aos traballadores por poñelos en risco”. Os populares instan a Tomé “a que confíe na tecnoloxía e na importancia da conciliación da vida laboral e familiar”. Castiñeira di: “O teletraballo veu para quedarse; é positivo e debe regularse. Máis confianza, señor presidente, nos traballadores e sobre todo moito máis coidado, porque as malas decisións ao final poden afectar a moita xente”.