Barreiros, 31 de agosto de 2021. O Concello de Barreiros contará cun novo tractor para os traballos de desbroce a mantemento de pistas municipais, grazas a un convenio de colaboración coa área de medio rural da Deputación de Lugo.
O convenio, que foi asinado na mañá de hoxe pola alcaldesa, Ana Ermida, e a delegada de medio rural, Mónica Freire; ascende a 136.000 euros, dos que 129.200 euros son aportados pola entidade provincial e 6.800 polo propio Concello.
Ana Ermida manifestou a súa satisfacción pola disposición da área de medio rural da Deputación a atender esta demanda que a propia alcaldesa tamén trasladara ao Conselleiro de Medio Rural nunha visita a Barreiros, “á vista das necesidades detectadas nestes anos e con afán de mellorar o parque de maquinaria municipal.”
Ademais do tractor, o convenio inclúe pala dianteira para traballos en firme e un brazo desbrozador para traballos de limpeza da vexetación.
Ermida explica que “ o Concello de Barreiros dispón en propiedade dun tractor de preto de 20 anos e máis de 20.000 horas de traballos, ao que se lle intercambia unha máquina desbrozadora traseira adquirida recentemente e un brazo desbrozador necesario para muros e valados, que tamén ten unha antigüidade superior aos 12 anos.”
“Esta situación supón que os traballos leven un ritmo moi baixo xa que a maquinaria é moi sensible a avarías e as incidencias durante a época alta de traballo son moi abundantes. Isto sumado a que os traballos deben desenvolverse nun prazo temporal moi concreto, supón que o servizo prestado non sexa todo o satisfactorio que se agarda dunha institución pública que debe, ademais, ser exemplar no cumprimento das súas obrigas”, asegura a rexedora.
Nese sentido, o goberno municipal valora moi positivamente a posibilidade de contar con maquinaria nova que se suma á existente para mellorar sensiblemente os servizos prestados e, dese xeito, poder levar a cabo directamente e dun xeito máis eficiente os traballos relacionados co mantementos dos máis de 100kms de vías municipais.
Esta adquisición de maquinaria e vehículos municipais súmase á adquirida no 2019, tamén grazas á colaboración da área de medio rural da Deputación, para desbroces de áreas públicas e á adquisición de dous vehículos para o servizo de augas no ano 2020 con cargo ao Plan Único financiado pola Deputación.
Deste xeito, explica Ana Ermida, “estase a facer un esforzo tamén económico para dotar ao Concello de Barreiros dun parque de maquinaria e vehículos digno para un concello das nosas características; xa que no momento en que accedemos ao goberno detectamos numerosas carencias deste tipo que estamos, pouco a pouco, tratando de solventar.”
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
