Santiago, 7 de setembro de 2021. O voceiro de Pesca do Grupo Socialista, Julio Torrado, vén de denunciar a falla de investimento da Xunta nos portos de Galicia. Fíxoo, hoxe, a través da presentación dunha pregunta na Comisión de Pesca do Parlamento, logo de verificar que durante o primeiro trimestre do ano, o goberno galego non investise “nin un só euro” e cando dispón dunha partida orzamentaria de máis de 10 millóns de euros para esta cuestión.
Isto supón, subliñou, un “desleixo de difícil explicación” para unha administración que debe xestionar o mantemento e conservación dos portos, así como unha “falla de rigorosidade” e un “exercicio laxo” na execución da partida de conservación, construción e explotación portuaria por parte do goberno galego.
Neste senso, Torrado lamentou que unha execución de “cero euros” só pode significar dúas cousas: “ou que non fixo falla investir nin un só céntimo en mellorar os portos galegos”, o cal “é difícil de crer”; ou “que o goberno galego é tan conformista como que non foi quen de investir nin un só euro desta partida”-
Ao fío disto, o responsable socialista cualificou a situación de “preocupante” e destacou que “non sabemos que vai pasar o resto do ano porque estamos no mes nove –setembro- e aínda non sabemos o gasto que se executou ata metade do ano”.
Aproveitando as circunstancias, o voceiro socialista propuxo diversas “ideas” á Xunta “por se non as teñen”. Así, destacou na necesidade de “mellorar” os terreos portuarios no Grove e Cambados; adecuar o edificio da confraría de Vilanova; crear un pantalán para o porto deportivo de Cedeira; realizar o mantemento dos accesos e terreos portuarios de uso urbano en Cariño; ou o “axeitamento” do miradoiro de Limosa en Burela.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
