Lugo, 20 de outubro de 2021. O delegado territorial da Xunta en Lugo, Javier Arias, reuniuse hoxe con representantes de asociacións dos Camiños de Santiago da provincia de Lugo para informalos da marcha das obras de mellora da seguridade viaria que está a executar a Consellería de Infraestruturas e Mobilidade en puntos da ruta que conflúen con estradas autonómicas.
Arias incidiu en que as 36 actuacións programadas en 13 estradas de Lugo estarán listas a finais deste ano, para atender a maior afluencia de peregrinos que se espera en 2022. “Con esta medida contribuímos a reducir a perigosidade en zonas conflitivas e tamén melloramos a estética do Camiño nestes tramos, que serán máis agradables e cómodos para transitar a pé”, dixo o delegado.
Apuntou que desde o mes de xullo trabállase con intensidade para acometer as obras programadas nos trazados Francés, Primitivo, de Inverno e Norte no seu percorrido por 16 municipios da provincia de Lugo, cun investimento total de 466.800 euros.
As estradas LU-633 e LU-530 concentran o 55% das intervencións previstas. Na primeira estanse a acondicionar 11 tramos que coinciden co Camiño Francés en Pedrafita do Cebreiro, Triacastela, Samos e Portomarín; mentres que na segunda estase a reducir a perigosidade en 9 puntos que conflúen coa ruta Primitiva no seu percorrido pola Fonsagrada, Baleira, Castroverde e Lugo.
Entre as obras máis relevantes xa iniciadas ou completadas, Arias referiuse ás realizadas no pq 35+300 da LU-530 na Fontaneira (Baleira), cun investimento de 137.500 euros para mellorar a seguridade nun cruce mediante o reforzo da sinalización, a construción dunha pasarela de madeira e a instalación de barreiras de seguridade.
Reducir os riscos en cruces
En canto ao resto das actuacións, a maioría delas en cruces, afectan a dúas vías máis do percorrido Francés -a LU-637 en Triacastela e a LU-613 en Portomarín-; outras catro do Primitivo -a LU-701 e a LU-740 na Fonsagrada; a LU-232 en Lugo e a LU-231 en Palas de Rei; tres vías do Camiño de Inverno, onde se actuará en catro puntos da LU-933 ao seu paso por Quiroga e en senllos cruces da LU-652 na A Pobra do Brollón e da LU-213 en Chantada; e dúas estradas do Camiño Norte: a LU-133 ao seu paso por Ribadeo e Trabada e a LU-132 en Lourenzá.
As intervencións son acordes ás necesidades de cada treito e contemplan medidas como o reforzo da sinalización; a construción de sendas, muros, gabias transitables e pasarelas; a instalación de barreiras e varandas ou novos encamiñamentos e a pavimentación da ruta con pedra, entre outras.
Por último, Arias referiuse ás diferentes medidas impulsadas pola Xunta para ofrecer aos peregrinos a mellor imaxe de Galicia neste Xacobeo 21-22. Así, ademais de levar tempo traballando no acondicionamento, a sinalización e o embelecemento do Camiño, estanse a realizar melloras nos albergues da rede pública e púxose en marcha o seguro coronavirus, que contribuíu a recuperar a confianza de turistas e peregrinos ao ofrecer de maneira pioneira a tranquilidade de ter cubertos os gastos sanitarios e de aloxamento ante unha infección por covid-19.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
