O PP di que as medidas adoptadas pola Deputación para axudar a Ucraína “son un primeiro paso debido á iniciativa do PP, pero son insuficientes”

Lugo, 10 de marzo de 2022. Tarde, como sempre, e de maneira insuficiente, o goberno provincial decidiu facer caso da proposta do PP e empezar a adoptar medidas para enviar axuda a Ucraína. O portavoz popular, Javier Castiñeira, sinala que as medidas adoptadas neste sentido polo goberno presidido polo socialista José Tomé son un primeiro paso, pero son insuficientes e teñen que ir acompañadas doutras tamén reclamadas polo grupo provincial dos populares.

Castiñeira sinala: “O luns, día 7, o grupo provincial do PP rexistrou na Deputación unha carta dirixida ao seu presidente, pedindo accións con respecto á crise de Ucraína; tres días despois, hoxe, vemos que o presidente anuncia algunhas das medidas que nós puxemos enriba da mesa, entre elas a declaración institucional que pedimos e coa que, obviamente, estamos de acordo, e liñas de axuda en colaboración con oenegués”.

Os populares entenden que hai que “ser moito máis ambiciosos; as circunstancias esixen un protagonismo moito maior por parte da Deputación e non resumirse simplemente a axudas a oenegués para que logo elas as tramiten: iso está ben, pero debemos ser moito máis ambiciosos nese sentido, porque así o reclama a sociedade”.

Castiñeira explica: “Debemos coordinar coas outras administracións a acollida de refuxiados e, cos concellos, a recollida de material de axuda e poñela canto antes no seu destino, que non é outro que o pobo de Ucraína e todos aqueles que permanecen aínda no país que está sendo invadido por Putin”. En resumen, os populares din que “é un primeiro paso, debido á iniciativa do PP, pero é insuficiente”.