Viveiro, 6 de febreiro de 2023. O Concello de Viveiro solicítalle á Consellería de Infraestruturas e Mobilidade que non minta, que deixe de enganar aos veciños e veciñas de Viveiro e que non volva utilizar a Xunta de Galicia, que é unha institución pública, para facer campaña a favor do Partido Popular, igual que fixo hai catro anos e que volve a facer agora.
“O Concello de Viveiro non está bloqueando ningún trazado da variante e, de feito, non ten ningunha información nin con respecto ao trazado da ponte sobre a ría nin do anterior, entendendo que estaría en vigor o redactado pola Xunta de Galicia no ano 2010”, explica a alcaldesa de Viveiro, María Loureiro.
Hai que lembrar que no ano 2009 había un trazado para a variante de Viveiro consensuado e aprobado polo Consello da Xunta, aprobado polo pleno do concello e que contaba co apoio dos veciños, quedando unicamente realizar a licitación das obras.
Pero houbo un cambio no goberno da Xunta de Galicia e, en agosto de 2010, chegou ao Concello de Viveiro unha caixa, chea de planos, impoñendo un novo trazado. Ante este novo trazado, imposto pola Xunta de Galicia e sen consenso, presentáronse reclamacións tanto por parte dos veciños perxudicados como do Concello de Viveiro.
Por parte da Xunta de Galicia, en ningún momento se chamou ao Concello de Viveiro para reunirnos, para estudar e valorar a nova proposta, foi un trazado imposto, un pretexto para non facer a variante.
Dende aquela, a Xunta de Galicia non se volveu a poñer en contacto co concello, a pesar de que, dende o goberno municipal, se continuou reclamando un trazado da Variante para Viveiro.
En 2018 a Xunta de Galicia chamou ao Concello para informar da existencia dun “posible proxecto” para a Variante que consistiría na construción dunha ponte que cruzaría a ría de Viveiro, sen enviar a documentación necesaria para coñecer, de forma concreta, as características desta alternativa. Sobre este “posible proxecto”, a Xunta de Galicia mantivo unha reunión cun colectivo relacionado coa pesca.
Tal e como se indicou naquel momento, o goberno municipal non se posicionou nin a favor nin en contra deste posible trazado, tendo en conta que non se facilitou información suficiente para coñecer o seu alcance.
Este asunto foi tratado no Pleno da Corporación, a instancias dun dos grupos políticos municipais, que presentou unha moción para rexeitar dita infraestrutura sobre a ría. O Concello de Viveiro, co voto de calidade da Alcaldesa, rexeitou pronunciarse en contra, ao non ter elementos para poder formar un xuízo sobre a repercusión da proposta da ponte.
Independentemente do que persoalmente puideramos pensar, sen valorar se a ponte puidera ser eficiente ou non para o concello, co voto de calidade da Alcaldesa, votamos en contra de rexeitar este “posible proxecto”, sobre o que non tiñamos nin temos nada tanxible.
“Neste contexto, o Concello de Viveiro está tramitando o PXOM e para poder continuar cos trámites correspondentes por parte da Xunta de Galicia díxosenos que tiñamos que poñer o trazado da variante, polo que no PXOM se incluíu o trazado enviado pola Xunta de Galicia en 2010 e non o que estaba aprobado e consensuado inicialmente”, engade Loureiro.
A incorporación da variante ao documento do PXOM foi un condicionante, unha esixencia da Xunta de Galicia para continuar coa súa tramitación, polo que se incorporou o trazado de 2010, que fora aprobado e imposto pola Xunta de Galicia, para continuar coa tramitación do PXOM.
Un trazado que foi modificado no primeiro mandato de Alberto Núñez Feijoo, impoñendo aos veciños e veciñas de Viveiro un novo trazado sen ningún tipo de explicación e, sobre o cal, dende o concello se demandaron explicacións e reunións.
En palabras de Loureiro, “debe quedar claro que o Concello de Viveiro en ningún momento obstaculizou a Variante de Viveiro, quen vai crer que o goberno municipal queira obstaculizar unha infraestrutura tan necesaria para o noso concello?”.
Os feitos son os que son e tirando de hemeroteca poden lembrarse, paso a paso, como sucederon as cousas. “O que non se pode permitir é o que Partido Popular minta e utilice a Xunta de Galicia, que unha institución pública de todos e todas, para sacar rédito político”, insiste o concello.
O Concello de Viveiro nunca obstaculizou o trazado da Variante e, en todo caso, a falta deste trazado non é excusa para que a Xunta de Galicia non teña feito a VAC Costa Norte. Se houbera vontade política o corredor podería estar feito, como podería estar feito, tamén, o arranxo da LU-540, entre Viveiro e Roupar, anunciado hai catro anos en plena campaña electoral de 2019, sospeitando que volverá a saír nas próximas eleccións municipais. Non se pode permitir que se condicione a VAC ao trazado da Variante de Viveiro.
Dende o goberno municipal estamos loitando por sacar adiante o PXOM e a execución das actuacións que contribúan a minimizar o risco de inundacións en Xunqueira, para o que vimos traballando de forma consensuada con todos os grupos políticos municipais e nunca saimos publicamente para criticar ao Partido Popular, porque entendemos que hai cousas que se deben aclarar nos despachos e porque, por riba de todo, están os intereses dos veciños.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
