Isabel Rodríguez destaca en Ribeira de Piquín a necesidade de proxectos innovadores como o de Montes e Vales Orientais para facer fronte ao despoboamento rural

A subdelegada participou este xoves na presentación da iniciativa “Montes e Vales Orientais Territorio Rural Intelixente”

Ribeira de Piquín, 13 de abril de 2023. A subdelegada do Goberno en Lugo, Isabel Rodríguez, destacou hoxe en Ribeira de Piquín a necesidade de desenvolver proxectos de innovación social na provincia para facer fronte ao despoboamento do medio rural. “Dende as administracións é urxente traballar para dar resposta a unha responsabilidade común como é o reto demográfico, por iso debemos contribuír ao reequilibrio territorial e garantir a igualdade de oportunidades para que as persoas que viven no medio rural sigan vivindo del, ao tempo que atraemos e asentamos nova poboación nas nosas vilas”, manifestou a subdelegada.

Isabel Rodríguez, xunto a outras autoridades, participou este xoves na presentación da iniciativa “Montes e Vales Orientais Territorio Rural Intelixente” da FEGAMP e do GDR que ten como principal obxectivo a transformación das aldeas e vilas desta zona da provincia en espazos para a vida, o emprego e a autonomía da comarca.

Na súa intervención, a subdelegada subliñou que o reto demográfico “é un reto democrático que temos que atender” e remarcou que este tipo de propostas deben ir acompañadas do desenvolvemento de servizos públicos esencias de calidade, asegurar a funcionalidade do territorio con infraestruturas para a conectividade, tanto física como dixital, e facilitar a xeración de proxectos empresariais, culturais e sociais nos municipios.

“Porque o Lugo de interior non está baleiro nin está só. A forza, a perseveranza e a creatividade de persoas, do tecido asociativo dos pobos, de cooperativas, de produtores e emprendedores sociais, de organizacións da sociedade civil e das entidades locais, que combaten o declive socio-económico desde hai tempo, esixen para poder desenvolvelo unha cobertura de dereitos en condicións de igualdade”, engadiu.

Neste aspecto, Isabel Rodríguez felicitou á FEGAMP e ao GDR Montes e Vales Orientais por levar a cabo este tipo de proxectos e ideas pensadas no futuro dos pobos, detectando iniciativas e oportunidades que demostran o coñecemento das necesidades do territorio e os retos aos que se enfronta, tal e como reflicte que dos 13 municipios que conforman este espazo, con máis de 2.500 quilómetros cadrados de territorio, tan só conta con 22.000 habitantes.

Por último, a subdelegada advertiu que reverter décadas de concentración urbana e de abandono rural é un proceso longo e complexo que require impactos de transformación urxente e iniciativas que calen no tempo. “Por iso é a hora de sumar entre todos, de traballar máis e máis rápido, para aproveitar os recursos dos que dispoñemos”, apuntou.

Territorio Rural Intelixente
O plan “Montes e Vales Orientais Territorio Rural Intelixente” comprende tres liñas principais de actuación que consisten na creación dun Centro de Innovación, Emprendemento e Participación Social, un proxecto piloto de vídeo asistencia socio-sanitaria dirixida ás persoas maiores e a promoción de vivenda de alugueiro para fixar poboación. O GDR abarca os municipios da Pontenova, Meira, Ribeira de Piquín, Pol, A Fonsagrada, Negueira de Muñiz, Baleira, Navia de Suarna, Baralla, Becerreá, Cervantes, Láncara y Pedrafita do Cebreiro.