O balance do último pleno: tres anos para aprobar o inventario municipal e máis de cinco meses de tardanza para conceder licenza para unha obra social sobre a que o PP xa preguntara o ano pasado
Burela, 10 de maio de 2023. O candidato do PP á alcaldía de Burela, Manuel Rouco, considera que “volver repetir un goberno socialista suporía lentitude e desidia na tramitación burocrática e na toma de decisións” e iso “impide que Burela poda rexurdir das súas cinzas”. Así o puxo de manifesto tralo pleno deste mércores no que “quedou clara, unha vez máis, a forma de proceder do goberno socialista de Burela á fronte do cal está o señor Llano, o señor Fernández Rey e a señora López Moreno”.
O voceiro popular considera que “tres anos para aprobar o inventario municipal é un tempo inasumible para un Concello. Estamos a falar de practicamente un mandato para unha cuestión que, de media, acostuma durar como moito un ano. Pero o feito de que tarden mes e medio en resolver cada unha das alegacións presentadas, non axuda moito”. Rouco explica que “este é o ritmo de traballo ao que nos teñen acostumados tanto o alcalde coma os seus tenentes de alcalde”, entre os que se atopa a candidata do PSOE á alcaldía.
“O mesmo sucedeu cos outros dous puntos da orde do día da sesión plenaria. Un deles tiña como obxectivo regularizar unha licenza de obra de carácter social, algo que xa fora pedido polo Grupo Municipal Popular no pleno do pasado mes de decembro e que xa tiña que ter sido tramitado. Pero, na súa dinámica de arrastrar os pés, o PSOE burelés tardou máis de cinco meses en tramitar este asunto”, engade.
OS FEITOS DAN A RAZÓN AO PARTIDO POPULAR
“Hoxe constatouse tamén que o PP de Burela estaba no certo cando advertía, ao comezo do mandato, que o incremento inxustificado do custe do contrato de recollida do lixo -máis de 160.000 euros ao ano-, non ía levar aparellada ningunha mellora salarial nin das condicións laborais dos traballadores”, lembra o popular.
Rouco explica que “mentres que os mandatarios socialistas, especialmente o señor Ramiro Fernández, se empeñaron en negalo; agora constátase esa mentira do goberno do PSOE coa concentración dos traballadores da empresa adxudicataria ás portas da Casa do Concello xusto á saída do pleno”.
O candidato popular cre que “Burela é incapaz de seguir aguantando a parsimonia e ineficacia de sucesivos gobernos socialistas” fronte ao que ofrece “unha xestión eficiente e, sobre todo, atención aos veciños e traballadores”.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
