O goberno de Deputación resolveu en cinco meses 33 reclamacións por responsabilidade patrimonial, o que certifica “o perigoso” estado da rede viaria provincial, afirma o PP

Unha das reclamacións efectuadas ante a Deputación produciuse por mor dos danos a un vehículo na LU-P-4401, en Castro de Rei, sufriu un sinistro como consecuencia de fochancas na estrada

Lugo, 16 de xuño de 2025. 33 expedientes resoltos nos ata final de maio por parte de PSOE e BNG por accidentes na rede viaria provincial “todos como consecuencia dunha total falta de mantemento de PSOE e BNG durante os últimos 18 anos”.

O voceiro provincial popular, Antonio Ameijide, critica que “todos os días haxa que lamentar accidentes na rede de estradas da Deputación de Lugo porque tanto socialistas como nacionalistas se desentenderon do coidado das vías de titularidade provincial”.

Estas 33 reclamacións resoltas certifican que as estradas da Deputación “son moi perigosas” e que “son un verdadeiro problema para a circulación xa que en lugar de facilitar os desprazamentos o que provocan é medo entre os condutores xa que se expoñen a ter un accidente cada día”.

Antonio Ameijide explica que estas reclamacións van dende danos nas rodas ata desperfectos nos propios vehículos e todos os danos sendo producidos por mor da existencia “de fochancas de grandes dimensións que os condutores non poden esquivar”.

Unha das reclamacións efectuadas ante a Deputación produciuse por mor dos danos a un vehículo na LU-P-4401, en Castro de Rei, sufriu un sinistro como consecuencia de fochancas na estrada.

Outra das reclamacións resoltas foi por danos no pneumático e lamia da roda traseira esquerda dun vehículo na estrada LU-P-1611, en Marei (O Corgo), producidos ao pasar por unha fochanca que non puido evitar.

Outro condutor tamén danou os dous pneumáticos do lado dereito do vehículo na estrada LU-P-5207, en Ribadeo, por mor doutra fochanca, sendo tamén afectado outro vehículo que nese momento circulaba por esa estrada e non puido evitar a focha.

Antonio Ameiijde afirma que “todas estas reclamacións seguen a darnos a razón e a amosar como PSOE e BNG se afanan en mentir ao negar esta realidade, que a rede viaria provincial é perigosa”.

“Queda claro que non serven de nada os dous últimos plans anunciados por José Tomé xa que cómpre recordar que non se actuou na rede viaria provincial en 66 dos 67 concellos durante moitos anos e que estes anuncios só contemplan traballar no 9% dos 4.217 quilómetros das estradas da Deputación”, denunciou.